अर्थमन्त्री डा. स्वर्णिम वाग्लेले आगामी आर्थिक वर्षको बजेट निर्माणका विषयमा पूर्वअर्थमन्त्रीहरूसँग सुझाव लिएका छन् ।

बिहीबार काठमाडौंमा आयोजित एक कार्यक्रममा अर्थमन्त्री डा.वाग्लेले ८ जना पूर्वअर्थमन्त्रीसँग नयाँ बजेटका विषयमा सुझाव लिएका हुन् । 

त्यसक्रममा अर्थमन्त्री वाग्लेले पूर्वअर्थमन्त्रीहरूका अनुभव अनुशरण गर्ने बताए । 

‘बजेटको अन्तिम समयमा छु । तपाईंहरूको राम्रो अनुभवसहितको कार्यक्रम अनुशरण गर्दै जाने हो । अब मलाई नयाँ परिस्थितिमा आउन लागेको नयाँ बजेटमा सुझाव पाउँ । हामी सुशासनको जगमा टेकेर आम नेपालीको जीवनस्तर बृहत्तर बनाउने बजेट ल्याउन तयारी गरिरहेका छौं’, अर्थमन्त्री वाग्लेले भने । 

उनले अघिल्ला अर्थमन्त्रीहरूका पालामा राजनीतिक परिस्थिति अनुकूल, प्रतिकूल जस्तो भए पनि सबैको उद्देश्य देश र जनताका लागि राम्रो गर्ने रहेको अर्थमन्त्री वाग्लेको भनाइ छ । 

‘भलै त्यो बेलाको राजनीतिक परिस्थिति कति अनुकूल थिए कति प्रतिकूल । तर, उद्देश्य सबैको पवित्र र एउटै थियो- देश र जनताका लागि राम्रो गर्ने । तर,परिस्थितिले त्यो कति सफल भयो कति सफल भएन समीक्षाको विषय छ’, अर्थमन्त्री वाग्लेले भने, ‘नयाँ परिस्थितिमा अब हामी आएका छौं । हामी तपाईंहरूले गर्नुभएको राम्रो कामको अनुशरण गर्दै अघि बढ्ने हो । मैले पटक-पटक भन्ने गरेको छु हाम्रा अग्रजले देखाएको बाटो नै हिँड्ने हो । यही व्यवस्था र यही राजनीतिक प्राप्तिबाटै समृद्धि हासिल गर्ने हो ।’