२९ जेठ २०८३, शुक्रबार
मंगलबारलाई बोलाइएको प्रतिनिधिसभा बैठक निर्धारित समयको डेढ घण्टा बितिसक्दा पनि शुरू हुन सकेको छैन ।
मंगलबार दिउँसो बजेका लागि बोलाइएको बैठक दिउँसो २:४० सम्म पनि बस्न सकेको छैन । सभामुख डोलप्रसाद अर्याल बैठक सञ्चालनका लागि आन्तरिक छलफलमा छन् । उनले सत्तापक्ष र प्रतिपक्षसँग परामर्श गरिरहेका छन् ।
विपक्षी दलहरूले प्रधानमन्त्री वालेन्द्र (बालेन) शाहले संसद्मा बोलेको सीमा विवाद सम्बन्धी विषयमा माफी नमागेसम्म सदन चल्न नदिने बताएका छन् ।
आइतबारको प्रतिनिधिसभा बैठकमा प्रधानमन्त्री बालेनले ‘नेपालले पनि भारतको सीमा मिचेको रहेछ’ भन्ने अभिव्यक्ति दिएका थिए । उक्त अभिव्यक्ति राष्ट्रहित र राष्ट्रिय स्वाधीनताविरुद्ध रहेको भन्दै विपक्षी दलले विरोध गरिरहेका छन् । उनीहरूले प्रधानमन्त्रीको अभिव्यक्ति रेकर्डबाट हटाउन माग गरेका छन् ।
बालेनको अभिव्यक्तिका विषयमा सडकदेखि सदनसम्म आलोचना र विरोध भइरहेको छ ।
सोमबारको बैठक पनि विपक्षीको अवरोधका कारण कार्यसूचीमा प्रवेश गर्न पाएको थिएन । सभामुख अर्यालले आज मंगलबार दिउँसो १ बजेसम्मका लागि बैठक स्थगित गरेका थिए ।
विपक्षी दलको अवरोधका कारण मंगलबारको राष्ट्रियसभा बैठक बुधबारसम्मका लागि स्थगित भइसकेको छ ।
