पेरुका पूर्व राष्ट्रपति अल्बर्टो फुजिमोरीकी छोरी केइको फुजिमोरीले मुलुकको सर्वोच्च पद (राष्ट्रपति) का लागि चौथो पटक प्रयास गरिरहेकी छन्।

 सन् १९९४ मा मात्र १९ वर्षको उमेरमा आफ्ना पिताको कार्यकालमा 'प्रथम महिला' को भूमिका निभाएर चर्चामा आएकी ५१ वर्षीया केइको यसपटकको दोस्रो चरणको चुनाव (रनअफ) मा वामपन्थी उम्मेदवार रोबर्टो सान्चेजसँग प्रतिस्पर्धा गर्दैछिन्।

सन् २०११, २०१६ र २०२१ का तीनवटा लगातारका चुनावमा पराजय भोगिसकेकी केइकोका लागि यो चुनाव 'गर या मर' को अवस्था जस्तै छ। विगत १० वर्षमा ८ जना राष्ट्रपति फेरिएर चरम राजनीतिक अस्थिरता र भ्रष्टाचारबाट गुज्रिरहेको पेरुमा उनले 'शान्ति र सुव्यवस्था' (अर्डर) लाई आफ्नो मुख्य एजेन्डा बनाएकी छन्।

सन् १९९४ मा आफ्ना मातापिताबीचको सम्बन्ध विच्छेद र आमा सुसाना हिगुचीले सरकारभित्रको भ्रष्टाचारको खुलासा गरेपछि केइकोले कम उमेरमै प्रथम महिलाको जिम्मेवारी सम्हालेकी थिइन्। त्यसयता उनी पेरुको राजनीतिमा एक शक्तिशाली तर विवादित पात्रका रूपमा रहँदै आएकी छन्। उनले 'फुयर्जा पपुलर' (पपुलर फोर्स) नामक दक्षिणपन्थी पार्टीको नेतृत्व गर्छिन्।

केइकोको राजनीतिक यात्रा विवादरहित भने छैन। ओडेब्रेक्ट निर्माण कम्पनीबाट अवैध चुनावी चन्दा लिएको आरोपमा उनले अनुसन्धानका क्रममा १३ महिना जेलमा बिताउनुपरेको थियो। यद्यपि, सन् २०२५ को जनवरीमा अदालतले उनीविरुद्धको मुद्दा खारेज गरिदिएपछि उनलाई चुनावी मैदानमा उत्रन सहज भएको हो। उनले आफूलाई १० वर्षसम्म राजनीतिक प्रतिशोधको सिकार बनाइएको दाबी गर्दै आएकी छन्।

उनका पिता अल्बर्टो फुजिमोरी (सन् १९९०-२०००) को विरासतले पेरुको राजनीतिलाई अझै पनि विभाजित गरेको छ। अल्बर्टोलाई कतिपयले चरम आर्थिक संकट र आतंकवाद अन्त्य गर्ने नायक मान्छन् भने कतिपयले मानवअधिकार उल्लंघन गर्ने तानाशाहका रूपमा हेर्छन्। यही कारणले गर्दा पेरुमा 'केइको नो भा' (केइको आउनु हुँदैन) भन्ने एउटा ठूलो तप्का र आन्दोलन सधैं सक्रिय रहने गर्छ।

यसपटकको चुनावमा केइकोले आफ्नो छवि सुधार्ने प्रयास गरेकी छन्। उनले विगतमा आफू निकै आक्रामक भएको स्वीकार गर्दै यसपटक थप संयमित र अनुभवी भएर प्रस्तुत भएको बताएकी छन्।

आलोचकहरूले पेरुको वर्तमान राजनीतिक अस्थिरताको मुख्य कारक केइको र उनको पार्टीलाई मान्ने गरेका छन्। संसद्मा बहुमत हुँदा उनले कार्यकारी प्रमुखलाई काम गर्न नदिएको र शक्ति संघर्ष निम्त्याएको आरोप लाग्ने गरेको छ।

अर्कोतर्फ, उनका प्रतिद्वन्द्वी रोबर्टो सान्चेजलाई पूर्व राष्ट्रपति पेड्रो कास्टिलोको कमजोर छायाका रूपमा हेरिएको छ, जसका कारण केइकोलाई यसपटक केही फाइदा पुग्न सक्ने विश्लेषण गरिएको छ। 

३५ जना उम्मेदवार चुनावी मैदानमा हुँदा कसैले पनि २० प्रतिशतभन्दा बढी मत ल्याउन नसकेपछि यो दोस्रो चरणको मतदान हुन लागेको हो। ३० वर्षभन्दा लामो राजनीतिक अनुभव सँगालेकी केइकोका लागि यो आइतबारको चुनाव परीक्षाको घडी बनेको सीएनएनएले समाचारमा उल्लेख गरेको छ ।