विराटनगरमा सुधार गृह पठाउने तयारी गरिएका एक युवकले चक्कु प्रहार गर्दा प्रहरीसहित तीन जना घाइते भएका छन् ।

विराटनगर महानगरपालिका–१, ठूलो मिल दक्षिणस्थित मोहन भट्टराईको घरमा डेरा गरी बस्ने २९ वर्षीय रुबिन कार्कीले अन्धाधुन्ध चक्कु प्रहार गरेका हुन् ।

रामेछाप स्थायी घर भई विगत १५ वर्षदेखि विराटनगरमा आमासँग बस्दै आएका कार्की लागुऔषध प्रयोगकर्ता रहेको स्थानीयले बताएका छन् ।

उनलाई आइतबार दिउँसो काठमाडौंको एक सुधार गृह पठाउने तयारी भएको थियो ।

आफूलाई सुधार गृह पठाउने तयारीबारे थाहा पाएपछि उनले कोठाको ढोका थुनेर आत्महत्याको प्रयास गरेका थिए । त्यसपछि उनकी आमाले प्रहरीलाई खबर गरेकी थिइन् ।

सुधार गृहका प्रतिनिधि, आफन्त र प्रहरीले कोठाभित्र रहेका कार्कीलाई सम्झाइबुझाइ गरेका थिए । तर, उनले अचानक चक्कु निकालेर आक्रमण शुरू गरेका थिए ।

कार्कीको चक्कु प्रहारबाट सीआरभी भट्टाचोकका प्रहरी सहायक निरीक्षक भोजराज रेग्मी, प्रहरी जवान हिमाल घिमिरे र सुधार गृहका कर्मचारी सन्तोष सापकोटा घाइते भएका छन् ।

मोरङ प्रहरीका प्रवक्ता एवं डीएसपी मकेन्द्रकुमार मिश्रका अनुसार घाइते तीनै जनाको टाउकोमा चोट लागेको छ । उनीहरूको हाल विराटनगरस्थित नोवेल अस्पतालमा उपचार भइरहेको छ ।

आक्रमणपछि युवकले पुनः कोठाको ढोका थुनेका थिए । हतियारसहित कोठाभित्र लुकेका उनलाई नियन्त्रणमा लिन प्रहरीलाई एक घण्टाभन्दा बढी समय लागेको थियो ।

ढोका खोल्न अस्विकार गरेपछि प्रहरीले भर्‍याङको प्रयोग गरी झ्यालबाट भित्र पसेर उनलाई नियन्त्रणमा लिएको थियो ।

घटनाको जानकारी पाएलगत्तै जिल्ला प्रहरी कार्यालय मोरङबाट डीएसपी सन्तोष श्रेष्ठ र वडा प्रहरी कार्यालय विराटनगरबाट प्रहरी निरीक्षक बेनु कार्कीको नेतृत्वमा थप टोली घटनास्थल पुगेको थियो ।

डीएसपी मिश्रका अनुसार पक्राउ परेका कार्कीलाई अहिले जिल्ला प्रहरी कार्यालय मोरङमा राखेर घटनाबारे थप अनुसन्धान भइरहेको छ ।