स्याङ्जाको चापाकोट नगरपालिका–४ पुम्दीमा टिप्पर दुर्घटना गराएर फरार रहेका चालक १७ दिनपछि पक्राउ परेका छन् ।

जिल्ला प्रहरी कार्यालय स्याङ्जाका अनुसार गत जेठ २७ गते मल्याङ्कोटबाट घुर्लिचौरतर्फ सडक निर्माणका लागि बालुवा बोकेर जाँदै गरेको ग १ क ४४४६ नम्बरको टिप्पर उकालोमा चिप्लिएर करिब १०० मिटर तल खसेको थियो । दुर्घटनामा टिप्परमा कार्यरत दुई जना घाइते भएका थिए।

घाइतेमध्ये म्याग्दीको मालिका गाउँपालिका–५ देविस्थानका २३ वर्षीय तिलक परियारको उपचारका लागि गह्रौ स्वास्थ्य केन्द्र, वालिङ लगिएपछि चिकित्सकले मृत घोषणा गरेका थिए ।

अर्का घाइते १८ वर्षीय करण परियारको हात र खुट्टामा चोट लागेको थियो। उपचारपछि उनी सोही रात डिस्चार्ज भएका थिए ।

दुर्घटनापछि फरार रहेका टिप्पर चालक दाङको शान्तिनगर गाउँपालिका–१ का २६ वर्षीय रेषमबहादुर गिरीलाई असार १२ गते बिहान करिब ८ बजे चापाकोट नगरपालिका–९ सुन्तलीटारस्थित कालिगण्डकी होटलबाट प्रहरीले पक्राउ गरेको हो ।

प्रहरी सहायक निरीक्षक बोमबहादुर जिसीको नेतृत्वमा खटिएको टोलीले चालकलाई नियन्त्रणमा लिएको जिल्ला प्रहरी कार्यालय स्याङ्जाले जनाएको छ।

उक्त टिप्पर सडक निर्माणको जिम्मा लिएको कम्पनीको काममा प्रयोग भइरहेको थियो ।

इलाका प्रहरी कार्यालय चापाकोटका प्रमुख एवं प्रहरी नायब उपरीक्षक गणेश सापकोटाका अनुसार घटनाबारे थप अनुसन्धान भइरहेको छ ।