०७ साउन २०८३, बिहीबार
विश्वको सबैभन्दा ठूलो खेलकुद उत्सवका रूपमा रहेको फिफा विश्वकप–२०२६ को सोमबार राति भव्य समापन हुँदैछ ।
अमेरिका, क्यानडा र मेक्सिकोले संयुक्त रूपमा आयोजना गरेको यो ऐतिहासिक संस्करणको अन्तिम खेल न्यू जर्सी स्टेडियममा हुनेछ ।
साविक विजेता अर्जेन्टिना र स्पेन उपाधिका लागि आमने–सामने हुँदैछन् । फाइनल खेल शुरू हुनुभन्दा ९० मिनेटअघि स्टेडियममा भव्य समापन समारोह शुरू हुनेछ ।
४८ राष्ट्रले सहभागिता जनाएको यो विश्वकपको यादगार यात्रालाई संगीत, संस्कृति र फुटबलको संगममार्फत विशेष बनाउन फिफाले एक विशेष कार्यक्रमको तयारी गरेको छ ।
समापन समारोहको मुख्य आकर्षणका रूपमा विश्वप्रसिद्ध गायक पोस्ट मलोन रहने छन् । उनको प्रस्तुतिले समारोहमा विशेष रौनक थप्ने अपेक्षा गरिएको छ ।
यसैगरी, हलिउडका स्टार टम क्रुजको विशेष उपस्थिति रहनेछ भने निकोल सर्जिन्जर, रोबी विलियम्स र आईशोस्पिडले आफ्नो सांगीतिक प्रस्तुति दिनेछन् ।
यसैगरी, एमी, ग्रामी, ओस्कर र टोनी अवार्ड विजेता चर्चित गायिका जेनिफर हडसनले फाइनल खेलअघि अमेरिकाको राष्ट्रिय गान गाउनेछिन् । अर्का चर्चित कलाकार क्रिस्टोफर माचिओले ‘अमेरिका द ब्युटिफुल’ प्रस्तुत गर्नेछन् ।
आयोजक फिफाले स्टेडियम पुग्ने दर्शकहरूलाई समयमै उपस्थित हुन आग्रह गरेको छ । समापन समारोह खेल शुरू हुनुभन्दा डेढ घण्टा अघि शुरू हुने र त्यसमा दर्शकहरूको सक्रिय भूमिका रहने जनाइएको छ ।
यसैगरी, फिफा विश्वकपको फाइनलमा हुने हाफटाइम शो पनि उत्तिकै आकर्षक रहनेछ । कोल्ड प्ले ब्यान्डका लिग सिंगर क्रिस मार्टिनद्वारा क्युरेट गरिएको यो शोमा शाकिर, बर्ना ब्वाई, म्याडोना, जस्टिन बीबर, के–पप सेन्सेसन र भेनेजुएलाका प्रसिद्ध गुस्ताभो डुडामेलको प्रस्तुति रहनेछ ।
