०७ साउन २०८३, बिहीबार
बुटवलमा आएको हरियो खुर्सानीमा फेरि खानै नमिल्ने विषादी भेटिएको छ । बुटवल कृषि उपज तथा थोक बजार केन्द्रस्थित विषादी अवशेष द्रूत विश्लेषण प्रयोगशा इकाईमा सल्यानबाट आएको हरियो खुर्सानीमा खानै नमिल्ने विषादी भेटिएको हो ।
प्रयोगशालाका नायव प्राविधिक सहायक राजीव भण्डारीले कपुरकोट गाउँपालिका सल्यानको ओम निखिलम तरकारी पसलबाट आएको हरियो खुर्सानीमा कार्बामेट ८.०९३८ र अर्गानोफस्फेट ५९.५२१७ प्रतिशत भेटिएको जानकारी दिए ।
यस्ता विषादी ४५ प्रतिशतभन्दा बढी भेटिए विसर्जन गर्नुपर्ने हुने भण्डारीले बताए ।
बुटवलमा पटक-पटक हरियो तरकारीमा विषादी भेटिँदै आएको छ । यस्ता विषादी बुटवल उपमहानगरपालिकाको रोहबरमा नष्ट गरिने उपप्रमुख सावित्रादेवी अर्यालले जानकारी दिइन् ।
मानव स्वास्थ्यलाई गम्भीर असर पुर्याउने यस्ता विषादी प्रयोग गरेपछि किसानले पर्खिनुपर्ने समय (वेयटिङ पिरियड)अगावै बजारमा पठाउदा यस्तो भइरहेको उनको भनाइ छ ।
