०७ साउन २०८३, बिहीबार
काठमाडौं प्रहरीले होटलको कोठामा युवतीको हत्या गरी फरार भएको आरोपमा एक युवकलाई पक्राउ गरेको छ ।
पक्राउ पर्नेमा दैलेखको डुङ्गेश्वर गाउँपालिका–६ घर भई हाल काठमाडौं महानगरपालिका–३, चक्रपथ साम्बाला नजिक बस्दै आएका २७ वर्षीय रमेश बुढा रहेका छन् ।
उनलाई सोमबार पक्राउ गरिएको जिल्ला प्रहरी परिसर काठमाडौंले जनाएको छ ।
जिल्ला प्रहरी परिसर काठमाडौंका अनुसार यही साउन ३ गते काठमाडौं महानगरपालिका–२६, मित्रनगरस्थित शेरबहादुर खत्रीको चारतले घरमा रहेको होटल माउन्टेन प्लाजाको चौथो तलाको ४०४ नम्बर कोठामा एक युवती मृत अवस्थामा फेला परेकी थिइन् ।
घटनाबारे जानकारी पाएपछि प्रहरी टोली परिचालन भई प्राविधिक विश्लेषण तथा अनुसन्धान अघि बढाइएको थियो ।
अनुसन्धानका क्रममा उक्त शव कैलालीको धनगढी उपमहानगरपालिका–७ घर भई हाल काठमाडौं महानगरपालिका–१६, माछापोखरी बस्ने २५ वर्षीया निशा सुनारको रहेको पत्ता लागेको थियो ।
प्रहरीले ती युवतीको हत्यामा संलग्न रहेको आरोपमा बुढालाई पक्राउ गरि थप अनुसन्धान गरिरहेको जनाएको छ ।
