दैलेखका रमेश बुढा कास्कीमा सानोतिनो व्यापार गर्दै आएका थिए । गत असार ३१ उनी एक लाख रूपैयाँ बोकेर घर जान भन्दै काठमाडौंको गोंगबुस्थित नयाँ बसपार्क पुग्छन् ।

त्यहाँ एउटी युवतीतिर उनको आँखा पर्छ । युवतीले ‘जाने हो ?’ भनेर प्रश्न गर्छिन् । बुढा ‘हुन्छ’ भन्दै मुन्टो हल्लाउँछन् । दुवै जना पुग्छन्, गोंगबुमा रहेको होटल माउन्टेन एल्सिभा । तर, कोठा बुक भने अर्कैले गरेका हुन्छन् । उनी हुन्, जुम्ला चन्दननाथ गाउँपालिका–१ घर भएर बाँके बस्ने दानबहादुर शाही ।

होटलमा पुगेपछि युवतीले बुढालाई ‘तपाईंको पसिना धेरै गन्हायो, नुहाएर आउनुस्’ भन्दै बाथरूम पठाउँछिन् । अनि युवतीले बुढाको खल्तीमा रहेको एक लाख रूपैयाँ लिएर भाग्छिन् । 

बुढा नुहाएर बाथरूमबाट बाहिर निस्कँदा युवती नभेटेपछि उनले खल्ती र झोला चेक गर्दा एक लाख रूपैयाँ भेटिन्न । अनि होटलका कर्मचारीलाई आफूसँग आएको युवती खै भन्दै सोधखोज गर्छन् । तर, पैसा गायब भएको कुरा त्यहाँ बताउँदैनन् ।

असार ३१ गते त्यस्तै भयो । ३२ गते बुढा ती युवती बसपार्क छेउछाउमै भेटिन्छिन् कि भन्दै यताउता हेर्छन् । नभन्दै युवती भेटिइन् । मुखमा मास्क लगाएका बुढाले उनै युवतीलाई ‘होटल जाने हो ?’ भनेर सोध्छन् । युवतीले ‘हुन्छ’ भन्छिन् । 

बुढाले पहिल्यै बुक गरेको कोठामा लैजान्छन् । अनि मास्क खोल्दा युवती झल्याँस्स हुन्छिन् । बुढामाथि बियरको बोतल प्रहार गर्छिन् । बुढाले बोतल खोसेर टाउकोको पछाडि भागमा प्रहार गर्छन् । युवती भुइँमा लड्छिन् । त्यतिले पनि नपुगेर बुढाले आफूले लगाएको बेल्टले युवतीको घाँटी कसेर हत्या गर्छन् ।

युवतीको शव तह लगाउन उनले पलङमुनि लुकाउँछन् । अनि होटलबाट बाहिरिन्छन् । युवतीको हत्या भएकै दिन बुढाको साथी दानबहादुर शाही (पहिला जसले होटलको रुम बुक गरेका थिए) र उनका साथीहरू त्यही रुममा मदिरा सेवन गरेर रात बिताएका थिए । युवतीको शव लुकाएको कोठामा दुई रात बिताउँदा पनि कसैले चाल पाउँदैनन् ।

साउन ३ गते बिहान ११ बजे होटलका कर्मचारीले गन्ध आएपछि प्रहरीलाई खबर गर्छन् । बल्ल प्रहरी अनुसन्धान शुरू हुन्छ ।

जिल्ला प्रहरी परिसर काठमाडौंका प्रमुख एवं प्रहरी वरिष्ठ उपरीक्षक (एसएसपी) दिलिप घिमिरेका अनुसार शुरूमा प्रहरी पुगेर खानतलासी गर्दा युवतीको हत्या गरेर पलङभित्र लुकाएको अवस्थामा फेला परेको हो । 

‘शव भेटिएको रूम कसले बुक गरेको रहेछ भनेर हेर्दा दानबहादुर शाहीको नाम र नम्बर उल्लेख थियो । सीसीटीभी पनि हेर्‍यौं, युवती होटलभित्र आएको देखिन्छ’, एसएसपी घिमिरेले लोकान्तरसँग भने,‘शाही र बुढा पनि सँगै देखिन्छन् । अनि दुवैलाई पक्राउ गर्दा सबै तथ्य खुल्यो ।’ 

प्रहरीले पहिला शाहीलाई पक्राउ गरेको थियो । त्यसपछि मात्रै बुढालाई पक्राउ गरेको हो ।

अनुसन्धानका क्रममा बुढाले हत्या गरेको शव कैलालीको धनगढी उपमहानगरपालिका–७ घर भई हाल काठमाडौं महानगरपालिका–१६, माछापोखरी बस्ने २५ वर्षीया निशा सुनारको रहेको पत्ता लागेको थियो । 

एसएसपी घिमिरेका अनुसार सुनारलाई ‘अवाञ्छित गतिविधिमा’ लागेको भेटेपछि यसअघि प्रहरी वृत्त बालाजुले पटकपटक सम्झाइबुझाइ गरेको थियो ।

काठमाडौं परिसरका प्रवक्ता एवं प्रहरी उपरीक्षक पवनकुमार भट्टराईका अनुसार शाही र बुढाविरुद्ध कर्तव्य ज्यान कसुरमा  काठमाडौं जिल्ला अदालतबाट सात दिनको म्याद लिएर अनुसन्धान भइरहेको छ ।