बाराको सिम्रौनगढमा सवारी साधन जाँचका क्रममा प्रहरीमाथि हातपात गरेको आरोपमा दुई जनालाई पक्राउ गरी अभद्र व्यवहार कसुरमा अनुसन्धान अघि बढाइएको छ ।

जिल्ला प्रहरी कार्यालय बाराका अनुसार बिहीबार बिहान करिब ७:१२ बजे सिम्रौनगढ नगरपालिका–६ स्थित पावर हाउस चोकमा इलाका प्रहरी कार्यालय सिम्रौनगढ र अस्थायी ट्राफिक प्रहरी पोष्ट सिम्रौनगढबाट संयुक्त रूपमा सवारी साधन जाँच भइरहेको थियो ।

सोही क्रममा उत्तरबाट दक्षिणतर्फ आउँदै गरेको बा ५८ प ५७३० नम्बरको मोटरसाइकल अनियन्त्रित भई नहर पुलको पूर्वपट्टि डिभाइडरमा ठोक्किएर दुर्घटनामा परेको थियो । 

दुर्घटनापछि मोटरसाइकल र त्यसमा सवार व्यक्तिलाई उद्धार गर्ने क्रममा मोटरसाइकल चालक सिम्रौनगढ नगरपालिका–५ का १९ वर्षीय सुनिलचन्द्र दास र पछाडि सवार सोही स्थानका २० वर्षीय लालमोहन दासले प्रहरी टोलीलाई अपशब्द प्रयोग गर्दै गालीगलौज तथा हातपात गरेको प्रहरीले जनाएको छ ।

घटनापछि दुवै जनालाई मोटरसाइकलसहित नियन्त्रणमा लिई जिल्ला प्रशासन कार्यालय बाराबाट अभद्र व्यवहारसम्बन्धी कसुरमा सात दिनको म्याद थप गरी अनुसन्धान भइरहेको जिल्ला प्रहरी कार्यालय बाराले जनाएको छ ।