०७ साउन २०८३, बिहीबार
नेपाली कांग्रेसका सभापति गगन थापाले विगत १० वर्षमा सत्ता र शक्तिका लागि गलत अभ्यास भएको बताएका छन् ।
कांग्रेस महामन्त्री गुरूराज घिमिरेका कृतिहरू ‘बुद्ध, बीपी र आजका नेता र लिलिपुटका लघुमानव’ पुस्तकको सार्वजनिकीकरण कार्यक्रममा उनले त्यो समयमा नेपालको राजनीतिमा तानातान र सत्ता र शक्तिको लागि गलत ढङ्गको अभ्यास भएको दाबी गरे ।
'त्यो दशकमा सत्ता र शक्ति प्राप्त गर्नका लागि जुनसुकै काम पनि तिलाञ्जली दिने काम भयो,' उनले भने, 'विगतको कालो दिनलाई बिर्सेर नयाँ बाटोबाट अघि बढ्नुपर्ने बेला आएको छ ।'
सभापति थापाले नेपाली कांग्रेस त्यही मूल्यमान्यता र सिद्धान्त अनुसार नै अघि बढ्ने बताए । 'कुनै बेला गणेशमानज्यूले लौरो लिएर सडकमा उत्रिँदा सबै काठमाडौंवासी जुरुक्क उठ्ने गर्नुहुन्थ्यो,' उनले भने, 'अहिले कांग्रेस समय सान्दर्भिक पार्टी भएकाले फेरि जुर्मुराउने आशासहित अघि बढ्नका लागि आह्वान गर्दछु ।'
