०४ साउन २०८३, सोमबार
नेपाली कांग्रेसका सभापति गगन थापाले राष्ट्रिय स्वतन्त्र पार्टी (रास्वपा)ले सरकार चलाउने अधिकार पाए पनि संविधान र लोकतन्त्रमाथि खेलवाड गर्ने अधिकार नपाएको बताएका छन् ।
प्रजातान्त्रिक विचार समाजले आइतबार पोखरामा आयोजना गरेको कार्यक्रममा सभापति थापाले संविधानमाथि खेलवाड गर्ने कुरा आफूहरूलाई स्वीकार्य नहुने बताएका हुन् ।
‘रास्वपाले ५ वर्षका लागि सरकार सञ्चालनको म्याण्डेट पाएको छ । त्यहाँभित्र के हुन्छ चासोको विषय छैन, उसले ५ वर्ष सरकार चलाओस्,’ थापाले भने, ‘तर, प्रजातन्त्रमाथि खेलवाड गर्ने अधिकार पाएको होइन । संविधान र नागरिकको अधिकारको विषयमा खेलवाड गरिए कांग्रेसले विरोध गर्छ ।’
रास्वपा ठूलो पार्टी भए पनि देशलाई सम्हाल्ने शक्ति कांग्रेस भएको उनले बताए । ‘अहिले पनि सरकारले उत्ताउलो भएर काम गरेको छ, तर हामी उत्तेजनामा आएर प्रतिक्रिया जनाउन मिल्दैन । अहिले पनि सम्हाल्ने र देशलाई अर्को भड्खालोमा जान नदिने जिम्मेवारी कांगेसको हो,’ थापाले भने ।
उनले संविधान संशोधन हुनै हुँदैन भन्ने आफूहरूको धारणा नरहेको स्पष्ट गरे ।
