इरानले क्यास्पियन सागरमा आफ्नो एउटा व्यावसायिक जहाजमाथि युक्रेनले गरेको आक्रमणमा एक नाविकको मृत्यु भएको र अर्का एक जना घाइते भएको जनाएको छ ।

इरानको विदेश मन्त्रालयले शनिबार उक्त आक्रमणको कडा निन्दा गर्दै यसलाई राष्ट्रिय सुरक्षामाथिको आक्रमणको संज्ञा दिएको हो ।

मन्त्रालयका अनुसार आक्रमणपछि जहाजमा विस्फोट भएको थियो, जसमा एक नाविकको ज्यान गएको र अर्का एक जना घाइते भएका छन् ।

घटनापछि इरानले तेहरानस्थित युक्रेनका कार्यवाहक राजदूतलाई बोलाएर विरोधपत्र बुझाएको छ । इरानको सरकारी समाचार संस्था आईआरएनएका अनुसार तेहरानले उक्त घटनालाई शत्रुतापूर्ण र आपराधिक आक्रमण भन्दै आफ्नो राष्ट्रिय हित र सुरक्षाको रक्षा गर्ने स्पष्ट गरेको छ ।

युक्रेन–रुस युद्धका क्रममा रुसले इरानी डिजाइनका ड्रोन प्रयोग गर्दै आएको छ । त्यसको प्रतिरोध गर्दै आएको युक्रेनले इरानबाट आक्रमण झेलेका मध्यपूर्वका देशहरूलाई ड्रोन अवरोधसम्बन्धी आफ्नो अनुभव साझा गर्न प्रस्तावसमेत गरेको छ ।

यसैबीच, युक्रेनी राष्ट्रपति भोलोदिमिर जेलेन्स्कीले रुसले मध्यपूर्वका अमेरिकी सैन्य अड्डा र खाडी क्षेत्रका मुलुकबारे संकलन गरेका उपग्रह तस्वीर इरानलाई उपलब्ध गराइरहेको आरोप लगाएका छन् ।

जेलेन्स्कीका अनुसार युक्रेनी सेनाले हालै क्यास्पियन सागरमा रुसी युद्धपोत तथा इरानसँग सम्बन्धित सैन्य सामग्री ओसारपसारमा प्रयोग भएका जहाजलाई पनि निशाना बनाएको थियो ।

सामाजिक सञ्जाल एक्समार्फत उनले जुलाईको शुरूआतदेखि रुसले बहराइनका दुई, जोर्डनको एक र कुवेतको एक गरी चार अमेरिकी सैन्य हवाई अड्डाको उपग्रह निगरानी गरेको र ती तस्वीर पछि इरानमा पुगेको दाबी गरेका छन् ।

उनले रुसी उपग्रह तस्वीर संकलन र इरानद्वारा गरिएका आक्रमणबीच स्पष्ट सम्बन्ध देखिएको उल्लेख गर्दै ती तस्वीर आक्रमणको तयारी तथा क्षतिको मूल्यांकनका लागि प्रयोग भइरहेको आरोप पनि लगाएका छन् ।