काठमाडौं, २९ जेठ – मानसिक अस्पताल पाटनले अस्पतालका पूराना औजार तथा उपकरणहरू अव्यवस्थित रूपमा राखेको पाइएको छ ।

सरकारी स्वामित्वमा रहेका भौतिक सामाग्रीहरू प्रयोगविहीन भएपनि लिलामी प्रक्रियामा नगएसम्म सम्बन्धित निकायले सुरक्षित स्थानमा भण्डारण गरेर राख्नुपर्ने हुन्छ । तर पाटनमा रहेको मानसिक अस्पतालले अस्पतालमा उपयोगविहीन पुराना उपकरण तथा भौतिक साम्रागीहरूको सुरक्षित भण्डारण नगर्दा खिया लागेर बसेको छ ।

अस्पतालले  पुराना भएर अस्पतालको प्रयोगमा नआउने शय्या, दराज, कुर्ची लगायतका अन्य भौतिक समाग्री र उपकरणहरू अस्पतालको छतमा राखेको छ ।

अस्पतालले ती उपकरण तथा भौतिक सामाग्रीहरू अस्पतालको छतमा राखेको दुई वर्ष भइसकेको छ । खुला आकाशमुनि चर्को घाम र वर्षाका कारण ती सामाग्रीहरू खियाले समेत खाइसकेको छ । वरपरबाट अस्पतालको छतमा हेर्दा डम्पिङ साइडजस्तो देखिन्छ ।

सरकारी कार्यलयमा रहेका उपकरण तथा सामाग्रीहरू प्रयोगमा नआउने गरी बिग्रिएमा त्यसलाई लिलामी प्रक्रियाबाट व्यवस्थापन गर्ने प्रावधान रहेको छ ।

अस्पताल विकास समितिले जिल्ला प्रशासन कार्यलयका प्रतिनिधि, कोष तथा लेखा नियन्त्रण कार्यलयका प्रतिनिधि, प्राविधिकलाई राखेर प्रयोगमा नआउने उपकरण तथा भौतिक सामाग्रीहरू मूल्याङ्कन गरी सार्वजनिक रूपमा लिलामीको प्रक्रिया अगाडि बढाउनुपर्ने हुन्छ । तर मानसिक अस्पतालको अस्पताल विकास समितिले ती सामाग्रीहरूको न लिलामी प्रक्रिया अगाडि बढाएको छ न त सुरक्षित ठाउँमा नै राखेको छ ।

अस्पतालका एक कर्मचारीले आफूहरूले अस्पताल विकास समितिलाई पटक–पटक भनेपनि प्रयोगविहीन बनेका उपकरणहरू व्यवस्थापनमा चासो नदिएको बताए ।

‘दुई वर्ष भइसक्यो हामीले ती उपकरण तथा सामाग्रीहरू अस्पतालको छतमा नै देखेको, दुई वर्षदेखि घाम र पानीले गर्दा लिलामीमा समेत नबिक्ने गरी खिया लागिसकेको छ,’ नाम नबताउने शर्तमा अस्पतालका एक कर्मचारीले लोकान्तरसँग भने, ‘हामीले कतिपटक भनिसक्यौं, तर अहिलेसम्म ती सामानहरूको व्यवस्थापन भएको छैन ।’

पुराना उपकरणको अभिलेख नै छैन !

अस्पतालको स्टोरमा पनि प्रयोगविहीन उपकरणहरू थुपै छन् । अस्पताल प्रशासनले पुराना भएर प्रयोगविहीन बनेका उपकरणहरूको अभिलेख समेत नराखेको पाइएको छ ।

‘अस्पतालको स्टोर रुममा पनि बिग्रिएका उपकरणहरू थु्रपै छन्, बिग्रिएका, नबिग्रिएका सबै एकै ठाउँमा छ, मिलाएर पनि राखिएको छैन,’ स्रोतले लोकान्तरसँग भन्यो, ‘चहियो भने त्यहीँ बाट निकालेर लैजाने गरिन्छ, कति सामग्री छन् भन्ने व्यवस्थित अभिलेख नै छैन ।’

अस्पतालका सूचना अधिकारी डा. वासुदेव कार्कीले भने ठाउँ अभावमा ती उपकरण तथा सामाग्रीहरू छतमा नै राख्दै आएको बताए ।

उनले भने, ‘अस्पतालको प्रयोगमा नआउने भएपनि सरकारी सम्पत्ति भएपछि व्यवस्थितसँग राख्नुपर्ने हुन्छ, तर ठाउँ नभएर नै हामीले ती सामग्रीहरू छतमा राख्नुपरेको हो ।’

अस्पतालमा पुराना भएर प्रयोगविहीन बने उपकरण तथा भौतिक सामाग्रीहरू कति छन् भन्ने जानकारी आफूलाई नभएको उनले बताए ।

फोटो : गगन अर्याल