काठमाडौं –नेपाल वायु सेवा निगमका अध्यक्ष मदन खरेल आफूहरूसँग अन्तरक्रिया नगरी ‘भागेको’ भन्दै जापानको ओसाका निवासी नेपालीहरू आक्रोशित बनेका छन् ।

जापान भ्रमणमा रहेका अध्यक्ष खरेल र निर्देशक टंकनिधि दाहाल शुक्रवार ओसाका पुगेका थिए । ओसाकामा जीएस ट्राभल र जेटिभी ट्राभल एजेन्सीका प्रतिनिधिहरूसँग डिनर मिटिङ तय भएको थियो ।

ओसाकास्थित दिपशीखा इण्डियन नेपाली रेस्टूरेन्टमा आयोजित कार्यक्रमबारे जानकारी पाएपछि करीब ४० जना नेपाली त्यहाँ पुगेका थिए ।

निम्तो भने जाप्निजहरूसहित केही नेपालीलाई मात्र थियो ।

जापानी समयअनुसार साँझको ६ बजे रेस्टुरेन्टमा पुगेको अध्यक्ष खरेल सहितको नेपाली टोली ८ बजे बाहिरिएको हो ।

नेपालीहरूले ओसाका उडान कहिले हुन्छ, यहाँबाट उडान नै नगर्न खोजिएको हो भन्ने जस्ता प्रश्नहरू गरेपछि खरेल नेपालीहरूसँग तर्किएका थिए ।

त्यसपछि नेपाल एयरलाइन्सका जापानस्थित कन्ट्री डाइरेक्टर सन्तोष पाण्डेले केही नेपालीलाई एक्लाएक्लै लगेर सम्झाउने कोशिश समेत गरेका थिए ।

नेपालीहरूले अध्यक्ष खरेलसहितको नेपाली टोलीसँग सामूहिक अन्तरक्रिया गर्ने प्रस्ताव राखे पनि उनीहरू त्यसलाई बेवास्ता गरेर बाहिरिए ।

‘हामी खरेल सरसँग अन्तरक्रिया नगरी जाँदैनौं भनेर यहीँ बसिरहेका छौं,’ एक सहभागीले लोकान्तरसँग भने, ‘हामीलाई नेपाल एयरलाइन्सको एक थाल भातमा किन्न खोजियो । हामीले आफ्नो कुरा राख्न पनि पाएनौं ।’

स्वीकृति पाइसकेको ओसाका उडान नगरी टोकियो सार्न खोजिएको भन्दै ओसाका निवासी नेपालीहरू आक्रोशित छन् ।

पढ्नुहोस्, यो पनि :

निम्तो मागेर वायु सेवाका अध्यक्ष र निर्देशक जापानमा, राष्ट्रिय ध्वजावाहकको इज्जत नै धरापमा !