काभ्रेपलाञ्चोक, ११ चैत — सरकारले आगामी वैशाख ३१ गतेका लागि स्थानीय निकायको निर्वाचनको घोषणा गरेसँगै यत्तिखेर काभ्रेमा चुनावी जोडघटाउ शुरु भइसकेको छ ।
निर्वाचनको मिति नजिकिँदै गर्दा दलका नेता तथा कार्यकर्ता टिकटको लागि दौडधुपमा व्यस्त देखिएका छन् । चियापसल, तरकारीपसल तथा दूध डेरी लगायतका ठाउँहरूमा यत्तिखेर निर्वाचनमा को उठ्ने र कसले जित्ने भन्ने चर्चा हुने गरेको छ ।
दुई दशकसम्म जनप्रतिनिधिविहीन बन्नुपरेको पीडा भुल्दै यत्तिखेर गाउँगाउँमा चुनावी माहोल बनिरहेको नेकपा एमाले काभ्रेका अध्यक्ष टोकबहादुर वाइवाले जानकारी दिए ।
यत्तिखेर दलका कार्यालयहरूमा टिकटका लागि दौडधुप शुरु भइसकेको छ । नयाँ संरचनाअनुसार निर्माण भएका गाउँपालिका र नगरपालिकामा दलले यत्तिखेर आफ्ना कार्यक्रम बढाएका छन् । कांग्रेस, एमाले, माओवादी केन्द्र, राप्रपा, जनमोर्चालगायत दलले चुनावी अभियान शुरु गरिसकेका छन् ।
नयाँ संरचनाअनुसार काभ्रेमा ७ गाउँपालिका, ६ नगरपालिकामा कुन दलका कुन नेताले टिकट पाउन सक्छन् भन्नेमै चर्चा केन्द्रित छ । निर्वाचनलाई सबै राजनीतिक दलले आफ्नो प्रतिष्ठाको विषय बनाएका छन् ।
काभ्रेमा ६ नगरपालिका र ७ गाउँपालिका छन् । निर्वाचन आयोगले निर्वाचनको आवश्यक तयारी भइरहेको जनाएको छ । काभ्रेमा नयाँ संरचनाअनुसार बनेका १३ वटा स्थानीय तहका लागि १ सय ३५ वडाका दुई लाख ३७ हजार मतदाताले १ सय ८९ मतदान स्थलमा मतदान गर्ने जिल्ला निर्वाचन कार्यलय काभ्रेका प्रमुख मधुकर पोखरेलले जानकारी दिए ।
जिल्लामा यसपटक चार मतदानस्थल थपिएका छन् भने विगतको निर्वाचनभन्दा यसपटक २९ हजार मतदाता थपिएका छन् । पोखरेलका अनुसार निर्वाचनबाट काभ्रेका विभिन्न पदका ७ सय ३३ जनप्रतिनिधि निर्वाचित हुनेछन् ।
काभ्रेमा बनेपा नगरपालिका, पनौती नगरपालिका, धुलिखेल नगरपालिका, पाँचखाल नगरपालिका, नमोबुद्घ नगरपालिका गरी ६ वटा नगरपालिका छन् भने रोशी गाउँपालिका, खानीखोला गाउँपालिका, चौरी देउराली गाउँपालिका, तिमाल गाउँपालिका, बेथान चोक गाउँपालिका, भुम्लु गाउँपालिका, महाभारत गाउँपालिका गरी ७ गाउँपालिका रहेका छन् ।
यस्ता छन् सम्भावित उम्मेदवार
बनेपा नगरपालिका
नेपाली कांग्रेसका तर्फबाट बनेपा नगरपालिकामा मेयर पदका लागि राम जोशी, योगेन्द्रनाथ कर्माचार्य, कृष्ण गोपाल भैल, रामहरि श्रेष्ठको नाम चर्चामा छ भने एमालेबाट हरिदेव गिरी, मुक्ति विष्ट, लक्ष्मी नरसिंह बादे, लम्बोदर कायस्थ, रघुबर प्रधान लगायतको नाम चर्चामा छ । माओवादी केन्द्रबाट तुल्सी नारायण श्रेष्ठ, झलक लामिछाने, गोपाल घिमिरे, रन्जित सिंह कपाली लगायतको नाम चर्चामा छ ।
त्यसैगरी बनेपामा व्यवसाय गरी चर्चामा रहेका शुरकृष्ण बैद्य पनि मेयरको दाबेदार भएको चर्चा छ । उनलाई मेयर पदमा उभ्याउनका लागि नेपाली कांग्रेस र नेकपा एमालेका नेताहरू नै लागिपरेका छन् । राप्रपाले पनि बनेपामा उम्मेदवारी दिने बताएको छ ।
पनौती नगरपालिका
पनौती नगरपालिकामा मेयर पदका लागि कांग्रेसका तर्फबाट महेश पौड्यालको नाम अग्रस्थानमा छ । विगतमा पत्रकार महासंघ काभ्रेका अध्यक्ष समेत रहेका पौड्यालले पनौती नगरबाटे टिकट पाउने नेपाली कांग्रेसका जिल्ला तहका नेताहरू बताउँछन् ।
उनीसँगै पनौती नगरमा नेपाली कांग्रेसका भोला थापा, केदार भण्डारी, रामशरण भण्डारी लगायतको नाम समेत चर्चामा छ । निर्वाचनको माहोल तातिरहँदा कांग्रेसका जिल्ला अध्यक्ष मधु आचार्य र पूर्वअध्यक्ष शिव हुमागाईंको गृहनगर पनौतीमा उम्मेदवारका आकांक्षीको संख्या धेरै छ ।
त्यसैगरी नेकपा एमालेको तर्फबाट भीम न्यौपाने, वसुन्धरा हमगार्इं, अम्बुभवानी कार्की र सुरेश हमगाई, विश्वेश्वर बन्जाराको नाउँ चर्चामा छ । पार्टीका विश्वासिला र सर्वसाधरणमाझ लोकप्रिय रहेका भीम न्यैपाने निर्वाचनमा उठे एमालेबाट अरूको सम्भावना नरहेको एमाले जिल्ला स्रोत बताउँछ ।
माओवादी केन्द्रका तर्फबाट द्वारिकादास श्रेष्ठको नाउँ चर्चामा छ भने उनीसँगै जगनाथ गिरी र रामदास सुवालको नाउँ पनि चर्चामा छ ।
धुलिखेल नगरपालिका
धुलिखेलमा नेपाली कांग्रेसका तर्फबाट मेयर पदका लागि राजाराम गौतम, रमेश हुमागार्इं, समिर बेन्जु लगायतको नाउँ चर्चामा छ । गौतम युवापुस्ताका तर्फबाट चर्चित उम्मेदवार हुन् । त्यसैगरी नेकपा एमालेको तर्फबाट एमाले जिल्ला उपाध्यक्ष समेत रहेका अशोक ब्यान्जुको नाउँ सबैभन्दा बढी चर्चामा छ । ब्याजुसँगै रामकृष्ण हुमागाईं र टीकावल्लभ सापकोटाको नाउँसमेत चर्चामा छ । माओवादीबाट दिलसुन्दर श्रेष्ठ, पृथ्वीबहादुर थापा, सुवासकाजी श्रेष्ठ लगायतको नाउँ मेयरको उम्मेदवारको रूपमा चर्चामा छ ।
पाँचखाल नगरपालिका
पाँचखाल नगरपालिकामा मेयर पदका लागि नेपाली कांग्रेसका तर्फबाट कुमार लामिछाने, सुन्दरमणि आचार्य, महेश खरेल, गणेश अधिकारी, सावित्री लामिछानेको नाम चर्चामा छ । यीमध्ये महेश खरेलको नाउँ सबैभन्दा बढी चर्चामा देखिन्छ ।
नेकपा एमालेबाट पाँचखालमा कञ्चन अधिकारी, रुद्घबहादुर बानियाँ र रवीन्द्र सिपखान, मानबहादुर तामाङ, पुष्कर ढकाल, शिवराज भेटवाल लगायतकोे चर्चा छ । यसमध्ये कन्चन अधिकारी चर्चाका हिसावले अघि छन् । माओवादी केन्द्रबाट दामोदर अधिकारी र हरि दुलाल, रमेश काफ्ले लगायतको नाउँ चर्चामा छ । यीमध्ये हरि दुलालको नाउँ सबैभन्दा अघि देखिएको छ ।
नमोबुद्घ नगरपालिका नमोबुद्ध नगरपालिकामा नेपाली कांग्रेसका कुन्सङ लामा, इन्द्रबहादुर दाहाल, दिनेश भुर्तेल लगायतको नाउँ मेयरको उम्मेदवारको रूपमा चर्चामा छ । एमालेबाट टीपी शर्मा, गोमा भुर्तेल र पूर्णप्रसाद पाण्डेको नाम चर्चामा छ ।
माओवादीबाट रत्न लामा, मिडु खनाल, हरि तिमल्सिना लगायतको नाउँ मेयर पदका लागि चर्चामा छ ।
प्रमुख तीन दलबीच नै मुख्य प्रतिस्पर्धा रहेको स्थानीय नेताहरू बताउँछन् ।
मन्डन देउपुर नगरपालिका
मन्डन देउपुर नगरपालिकामा मेयर पदका लागि नेपाली कांग्रेसका तर्फबाट अच्युत पौड्याल, गोविन्द पराजुली, रामहरि सापकोटाको नाउँ अग्रपंक्तिमा छ भने एमालेबाट टोकबहादुर वाइवा, राधाकृष्ण बस्ताकोटी, कृष्ण कुमार श्रेष्ठ, निर्मला साहीको नाम चर्चामा छ । माओवादी केन्द्रबाट रिता ढकाल, विनोद ढकाल, ध्रुव काफ्ले, यदुनाथ गौतम लगायतको चर्चा छ ।
नयाँ शक्ति नेपाल, संघीय समाजवादी फोरम लगायतका दलले पनि स्थानीय निर्वाचनमा उम्मेदवारी दिने बताएका छन् । गाउँपालिकाहरूमा पनि चुनावी सरगर्मी बढेको छ । जिल्लाका दलहरू यत्तिखेर नगरपालिकामा आफ्नो वर्चस्व कायम राख्न बढी केन्द्रित भएको देखिन्छ ।
Advertisment
Advertisment