२० दिनपछि नेकपा सचिवालय बैठक : महासचिव पौडेललाई दल दर्ताको जिम्मेवारी

काठमाडौं – प्रमुख सत्तारूढ दल नेपाल कम्युनिस्ट पार्टी (नेकपा)ले आसन्न उपनिर्वाचनका लागि दल दर्ताको सम्पूर्ण प्रक्रिया पूरा गर्ने जिम्मा महासचिव विष्णु पौडेललाई दिएको छ ।

प्रधानमन्त्री निवास बालुवाटारमा बुधवार बसेको सचिवालय बैठकले उपनिर्वाचनका लागि पुन: दल दर्ताको काम फत्ते गर्ने जिम्मा पौडेललाई दिने निर्णय गरेको हो ।

'निकट भविष्यमा हुन गइरहेको उपनिर्वाचनका निम्ति पुन: दल दर्ता गर्नुपर्ने संवैधानिक व्यवस्था र निर्वाचन आयोगको सूचनाका आधारमा यही महिनाभित्र दल दर्ताका सम्पूर्ण प्रक्रिया पूरा गर्ने निर्णय भयो,' प्रवक्ता नारायणकाजी श्रेष्ठ प्रकाशले बैठकपछि भने, 'यो काम फत्ते गर्ने जिम्मेवारी महासचिव कमरेड विष्णु पौडेललाई दिइएको छ ।'

प्रतिनिधि सभा, प्रदेश सभा र स्थानीय तहमा रिक्त जनप्रतिनिधि चयन गर्न आगामी मंसिर १४ गते उपनिर्वाचन हुँदैछ ।

सांगठनिक एकीकरणका विषयमा टुंगो लगाउन छिट्टै अर्को बैठक बसेर छलफल गर्ने निर्णय पनि भएको प्रवक्ता श्रेष्ठले बताए ।

प्रधानमन्त्री समेत रहेका पार्टी अध्यक्ष केपी शर्मा ओलीको सिंगापुर भ्रमणका कारण २० दिनपछि मात्र नेकपा सचिवालय बैठक बसेको हो । 

ओली उपचारका लागि सिंगापुर जानुअघि बसेको बैठकमा उनी र सचिवालय सदस्य माधवकुमार नेपालबीच भनाभन भएको थियो ।

ओली-नेपाल विवादका विषयमा पनि केही छलफल भयो कि भन्ने प्रश्नमा प्रवक्ता श्रेष्ठ- 'भएको यत्ति हो' भन्दै बाहिरिएका थिए ।