३१ जेठ २०८३, आइतबार
सुस्त गतिको विकास, भ्रष्टाचार, प्रदूषण, बेरोजगारीलगायत तमाम निराशालाई बिर्साउँदै १३औं दक्षिण एसियाली खेलकुद (साग)मा नेपाली खेलाडीहरूले आशाको दियो बालेका छन् ।
आइतवार बिहानसम्ममा नेपाली खेलाडीले ४३ स्वर्ण, ३४ रजत र ६५ कास्य गरी कुल १ सय ४१ पदक जितेका छन् । साग खेलकुदमा नेपालको यो कीर्तिमानी प्रदर्शन हो । यसअघि आठौं सागको पदक तालिकामा दोस्रो स्थान हात पार्दा नेपालले ३१ स्वर्ण जितेको थियो ।
यसपटक जसले नेपाललाई स्वर्ण पदक दिलाएका छन्, तिनीहरूमध्ये अधिकांशको आर्थिक स्थिति बलियो छैन । पारिवारिक र व्यक्तिगत जीवनका समस्या तथा अभावको पर्वाह नगरी खेलाडीहरूले देशका लागि स्वर्ण पदक जितेका छन् ।
कराँते, तेक्वान्दो, पौडी, म्याराथोनमाजस्ता विधामा नेपाली खेलाडीहरूले उत्कृष्ट प्रदर्शन गरे । कुस्ती, साइकिलिङलगायतमा पनि नेपाली खेलाडीको प्रदर्शन सम्झनलायक रह्यो ।
रजत पदकमा चित्त बुझाउनु परेपनि नेपालले महिला भलिबलमा राम्रो प्रदर्शन गर्यो । फूटबलमा पनि नेपालको अहिलेसम्मको प्रदर्शन प्रशंसायोग्य नै छ ।
खेल क्षेत्रमा लागेका खेलाडीहरूलाई राज्यले पर्याप्त लगानी गरेको छैन । खेल क्षेत्र उपेक्षाको विषय बनिरहेकै छ । राष्ट्रिय बजेटको अत्यन्त थोरै हिस्सा मात्र खेल क्षेत्रमा छुट्याइने गरेको छ ।
साथै खेल क्षेत्र राजनीतिबाट पनि टाढा रहन सकेको छैन । राष्ट्रिय खेलकुद परिषद् खेल क्षेत्रका विज्ञभन्दा राजनीतिक भर्तिकेन्द्र बनेको छ ।
विदेशमा हुने अवसरमा खेलाडीको कोटामा राजनीतिक दलका कार्यकर्ताले असवर पाउने गरेका छन् ।
साग गेममा नेपाली खेलाडीले देखाएको कौशलले खेल क्षेत्रमा नेपालको भविष्य छ भन्ने कुरा पुष्टि गरेको छ ।
खेलकुदमा लगानी बढाउन र खेलाडीलाई प्रोत्साहन गर्न सके भविष्यमा हुने अन्तर्राष्ट्रिय प्रतियोगितामा खेलाडीले देशको नाम राख्नेमा दुई मत छैन ।
