१५ असार २०८३, सोमबार
फिफा विश्वकप २०२६ को आफ्नो पहिलो खेलमा स्वीडेनसँग ५-१ को लज्जास्पद हार व्यहोरेपछि ट्युनिसियाले मुख्य प्रशिक्षक साब्री लामोचीलाई बर्खास्त गरेको छ।
मेक्सिकोको मोन्टेरेमा भएको खेलमा टोलीको फितलो प्रदर्शनपछि ट्युनिसियाली फुटबल संघले लामोचीलाई पदमुक्त गर्ने निर्णय गरेको हो।
संघले आधिकारिक विज्ञप्ति जारी गर्दै लामोचीसँगको सम्झौता अन्त्य गरिएको जानकारी दिएको छ। उनको स्थानमा अब मोन्धेर केबायरलाई अन्तरिम प्रशिक्षकको रूपमा नियुक्त गर्ने तयारी गरिएको छ।
गत जनवरीमा मात्र जिम्मेवारी सम्हालेका लामोचीले जम्मा ५ खेलमा टोलीको नेतृत्व गर्ने अवसर पाएका थिए, जसमा उनले हाइटी विरुद्ध मात्र एक जित निकाल्न सफल भएका थिए।
विश्वकपको बीचमै प्रशिक्षक बर्खास्त गर्ने ट्युनिसियाको यो निर्णय फुटबल जगतमा विरलै हुने घटनामध्ये एक हो। यसअघि सन् १९९८ को विश्वकपमा पनि ट्युनिसियाले खराब सुरुवातपछि आफ्ना प्रशिक्षक हेनरी कास्परजाकलाई बीचमै हटाएको थियो।
समूह 'एफ' मा रहेको ट्युनिसियाले अब शनिबार जापानसँग आफ्नो दोस्रो खेल खेल्नेछ भने त्यसपछि नेदरल्याण्ड्सको सामना गर्नेछ। नयाँ प्रशिक्षकको नेतृत्वमा ट्युनिसियाले आगामी खेलहरूमा कस्तो सुधार गर्छ भन्नेमा सबैको चासो रहेको छ।
