०५ असार २०८३, शुक्रबार
नेकपा (एमाले) संसदीय दलका प्रमुख सचेतक ऐनबहादुर महरले अर्थमन्त्री स्वर्णिम वाग्लेले आफूबारे प्रश्न उठेपछि फाइल खोल्ने धम्की दिएको भन्दै आपत्ति जनाएका छन् ।
स्वर्णिम वाग्ले वौद्धिक भनेको एटिच्युडवाला रहेको उनले टिप्पणी गरे । मंगलवार प्रतिनिधि सभामा विनियोजक विधेयकमाथि अर्थमन्त्रालयमाथि खर्च कटौती प्रस्ताव पेश गर्दै महरले ३५ वर्षका फाइल खोल्न चुनौती दिएका हुन् ।
‘अर्थमन्त्री वाग्लेमाथि करका दर हेरफेर गरेको गम्भीर आरोप लागेको छ । विगतमा मन्त्रीमाथि प्रश्न उठ्दा जनार्दन शर्माले राजीनामा दिनुभएको थियो, गोकुल बास्कोटा र शेरबहादुर तामाङले राजीनामा दिनुभएको थियो,’ महरले भने, ‘अहिलेकाले धम्काउँदै हुनुहुन्छ, फाइल खोल्ने भनेर । ३५ वर्षका काण्ड खोलियोस् । तर अर्थमन्त्रीमाथि संसदीय छानबिन समिति गठन गर्नुपर्छ ।’
महरले यो बजेट कम्युनिस्टको होइन भन्ने अर्थमन्त्री वाग्लेलाई कम्युनिस्ट सरकारले शुरू गरेका सामाजिक सुरक्षा भत्ता कटाएर देखाउन चुनौती दिए ।
‘एकजना पूर्वप्रधानमन्त्रीलाई गाली शिरोमणिको आरोप लाग्ने गरेको थियो, अर्थमन्त्रीले यहाँ आफूलाई गाली शिरोमणिको रूपमा स्थापित गर्नुभएको छ,’ उनले भने, अरूलाई होच्याउने, अपमान गर्ने र विपक्षीलाई होच्याएर लोकतान्त्रिक संस्कृतिको हुर्मत लिने काम गर्नुभएको छ ।’
