युक्रेनले एक सातामा दोस्रो पटक मस्कोको तेल प्रशोधन केन्द्रमा ड्रोन आक्रमण गरेको छ भने आक्रमणका लागि पठाइएका युक्रेनी ५५५ ड्रोन खसालेको रुसले दाबी गरेको छ ।

आक्रमणका कारण मस्कोस्थित विमानस्थलहरूमा व्यावसायिक उडानहरूमा अवरोध आएको थियो ।

चार वर्षअघि रुसले युक्रेनमा आक्रमण गरेयता भएको यो सबैभन्दा ठूलो ड्रोन आक्रमण भएको एक रुसी अधिकारीले जानकारी दिएका छन् ।

रुसी रक्षा मन्त्रालयले आफ्नो हवाई प्रतिरक्षाले रातभर विभिन्न क्षेत्रमा रहेका ५५५ युक्रेनी ड्रोनलाई खसालेको दाबी गरेको छ । मस्कोका मेयर सेर्गेइ सोब्यानिनले केही ड्रोन आक्रमणले राजधानी मस्कोको तेल प्रशोधन केन्द्रलाई निशाना बनाएको बताएका छन् ।

रुसी यातायात मन्त्रालयले मस्कोका चार विमानस्थलबाट हुने उडानहरू स्थगित गरिएको जनाएको छ ।

युक्रेनका राष्ट्रपति भोलोदिमिर जेलेन्स्कीले अमेरिकी राष्ट्रपति डोनाल्ड ट्रम्प र फ्रान्सका राष्ट्रपति इमानुएल म्याक्रोँसँग महत्वपूर्ण समन्वय बैठक गरेको र त्यसले महत्वपूर्ण परिवर्तन ल्याउन सक्ने बताएका केही घण्टापछि यो आक्रमण भएको हो ।