चीनको वुहानबाट स्वदेश फिर्ता ल्याइएका १ सय ७५ जना नेपालीलाई भक्तपुरको खरिपाटीस्थित नेपाल विद्युत् प्राधिकरणको तालिम केन्द्रमा निर्मित क्वारेन्टाइनमा राखिएको छ ।

कोरोना प्रभावित क्षेत्रबाट ल्याइएकाहरूलाई राखिएको क्वारेन्टाइनमा जस्ताले वरिपरि बार लगाइएको छ । क्वारेन्टाइनका लागि प्राधिकरणका ४ वटा भवन प्रयोग भएका छन् ।

ठूला २ भवनमा पुरुष र परिवारसहित आउने टोली, रातो भवनमा महिला र अर्को सानो क्वार्टर भवनमा चिकित्सक सहितको स्वास्थ्यकर्मीको टोली बस्ने गरी ४ वटा भवनमा सबै संरचना जडान गरिएको छ ।

आइतवार बिहान त्रिभुवन अन्तर्राष्ट्रिय विमानस्थलमा अवतरण गरेका उनीहरूलाई विमानस्थलमा स्वास्थ्य परीक्षण गराई बसमा राखेर खरिपाटीस्थित क्वारेन्टाइन पुर्‍याइएको थियो ।

क्वारेन्टाइनका सबै भवनमा गरी १८ वटा सीसीक्यामरा, ८ टेलिभिजन, सबै ब्लकमा स्पीकर जडान गर्नुका साथै ओछ्यान, टाबेल, चप्पल, साबुन, मन्जन, ब्रश, माक्स र औषधिलगायत दैनिकरूपमा आवश्यक सबै सामग्री प्रत्येक शय्यामा पुर्‍याइएको छ । तीनवटा वासिङ मेसिनको समेत व्यवस्था गरिएको छ ।

एक कोठामा कम्तिमा एक मिटरको फरकमा २ देखि ३ शय्या रहने गरी कोठाको व्यवस्थापन गरिएको छ । शौचालय मर्मत, तातोपानी, खानका लागि शुद्ध पानी, कोठामा इन्टरकम टेलिफोन राखिएको छ ।

मनोरञ्जनका लागि २ ब्याडमिन्टन कोड निर्माण गरिएको छ भने क्यारेमबोर्ड, लुडो र बच्चाका लागि बल लगायतका खेल सामग्री व्यवस्था गरिएको छ ।

कोठाबाट बाहिर क्वारेन्टाइनभित्रको निश्चित क्षेत्रमा हिँडडुल गर्न समेत पाइने व्यवस्था गरिएको छ ।

दुईवटा स्वास्थ्य टोली २४ घण्टै रहनेछन्, जसमध्ये नेपाली सेनाका क्याप्टेन डा. नविन फूँयालको नेतृत्वमा नर्ससमेत स्वास्थ्य टोली क्वारेन्टाइनभित्र रहेको छ ।