विश्वव्यापी महामारीका रूपमा फैलिएको कोरोना भनिने कोभिड १९ सँग जुध्न प्रदेशका मुख्यमन्त्रीहरूले सरकारलाई प्रत्येक प्रदेशमा आइसोलेसन बेड र परीक्षण ल्याब बनाउन आवश्यक समन्वय गरिदिन आग्रह गरेका छन् ।

उपप्रधान तथा रक्षामन्त्री ईश्वर पोखरेलले सातवटै प्रदेशका मुख्यमन्त्री र सामाजिक विकासमन्त्रीहरूलाई सिंहदरबारस्थित प्रधानमन्त्री तथा मन्त्रिपरिषदको कार्यालयमा बोलाएर छलफल गरेका थिए ।

पोखरेल कोरोना रोकथाम तथा नियन्त्रण उच्चस्तरीय समन्वय समितिका संयोजकसमेत हुन् । करीब ३ घण्टा चलेको बैठकमा कोरोनासँग लड्ने पूर्वतयारीका सन्दर्भमा छलफल भएको थियो ।

छलफलमा प्रदेशबाट प्रतिनिधत्व गर्दै आएका मुख्यमन्त्री र सामाजिक विकासमन्त्रीहरूले सबै प्रदेशमा आइसोलेसन वार्डसहितका अस्पताल बनाउन र अहिले काठमाडौँमा मात्र रहेको कोरोना परीक्षण ल्याब सबै प्रदेशमा स्थापना गर्न संघ सरकारले समन्वय गर्नुपर्ने सुझाव दिए ।

प्रदेश ५ का सामाजिक विकासमन्त्री सुदर्शन बरालले संघ सरकारसँग प्रदेशलाई आवश्यक पर्ने सामग्रीहरू उपलब्ध गराउनुपर्ने माग गरेको बताए ।

'कोरोना जाँचका लागि प्रदेश स्तरमा ल्याब बनाउने र आइसोलेसन वार्ड थप्न केन्द्र सरकारबाट हामीले सहयोग र समन्वय मागेका छौं,' बरालले भने, 'यसका लागि प्रदेशले तयारी गर्ने र केन्द्रले आवश्यक सहयोग गर्ने कुरा उठ्यो ।'

बरालले आवश्यक नाकाहरू प्रदेश सरकारले सील गर्ने कुरा उठेको बताए । उपप्रधानमन्त्री पोखरेलले बजेटको अभाव नभएको भन्दै प्रदेशले आफ्नो तयारी थाल्न सुझाव दिएको लोकान्तरसँग बरालले बताए ।

पोखरेलले आज भएको छलफलका मुख्य विषयहरूलाई भोलि बस्ने समन्वय समितिको बैठकमा पेश गर्ने बताएका थिए ।

'भोलि संयन्त्रको बैठकमा आजका सुझावहरू पेश हुन्छन्, आवश्यक सबै निर्णय गरिन्छ,' पोखरेलको भनाई उदृत गर्दै बरालले भने ।

सातवटै प्रदेशका मुख्यमन्त्रीहरूले कोरोना रोकथामका लागि आफ्ना प्रदेशमा गरिएका पूर्वतयारीका बारेमा ब्रिफिङ दिएका थिए  ।

विश्वका डेढ सय देशमा हालसम्म करीब डेढ लाख मानिसहरूमा कोभिड १९ को संक्रमण देखिएको छ भने आधाआधी बिरामी निको भएर फर्किसकेका छन् । अहिलेसम्म कोरोनाकै कारण मृत्यु हुनेको संख्या ५ हजार नाघिसकेको छ ।

चीनको वुहान प्रान्तबाट शुरू भएको कोरोना चीनमा भने नियन्त्रणमा आइसकेको चिनियाँ स्वास्थ्य विभागले दाबी गरेको छ भने अहिले युरोपका कतिपय देश र अमेरिकामा तीव्र गतिमा फैलिएको छ ।

छिमेकी देश भारतमै पनि पछिल्ला दिनहरूमा कोरोना संक्रमितको संख्या बढेको छ ।

नेपालमा माघको तेस्रो सातामा एकजनामा संक्रमण देखिएको थियो तर ती व्यक्ति निको भएर घर फर्किसकेका छन् । करीब ५ सय जनाको परीक्षण गरिएको भएता पनि हालसम्म नेपालमा कोरोनाको संक्रमण देखिएको छैन ।

कोरोना रोकथाम तथा नियन्त्रण उच्चस्तरीय समन्वय समिति भने निरन्तर बैठक बसेर नयाँ नयाँ रणनीति तय गर्न व्यस्त देखिएको छ । प्रत्येक दिन जसो बैठक बसेर केही न केही निर्णय गरिरहेको समन्वय समितिको अनुगमनको काम भने फितलो रहेको आरोप लाग्दै आइरहेको छ ।