०८ साउन २०८३, शुक्रबार
जारी लकडाउनको अवज्ञा गर्दै कञ्चनपुर जिल्लाको पुनर्वास क्षेत्रमा प्रदर्शन भएको छ ।
नेपाल–भारत सीमा क्षेत्रबाट फिर्ता गराइएका नेपाली नागरिकलाई स्वदेश आउन दिनुपर्ने भन्दै शुक्रबार पुनर्वास नगरपालिका– ९ स्थित बीचफाँटाका स्थानीयले प्रदर्शन गरेका हुन् ।
स्थानीयहरूले प्रदर्शन गर्नुका साथै वडाध्यक्ष नारायणप्रसाद जैशीलाई घेराउ समेत गरेको स्थानीय पत्रकार दीपेन्द्र बस्नेतले जानकारी दिए ।
बिहीवार भारतको गुजरातबाट नेपाल फर्कन लागेका २ नाबालक सहित ७ जनालाई प्रहरीले सीमाबाटै फिर्ता पठाएपछि उनका आफन्त सहितका स्थानीयले गाउँ फर्कन दिनुपर्ने भन्दै प्रदर्शनमा उत्रेका हुन् ।
झन्डै डेढघण्टा वडाध्यक्षलाई घेरेका प्रदर्शनकारीसहित स्थानीय भीडलाई नेपाल प्रहरी र सशस्त्र प्रहरीले तितरबितर पारेको थियो ।
सरकारले सीमा क्षेत्रमा सशस्त्र प्रहरी परिचालन गरी सीमामा कडाइ गरेको छ ।
जिल्ला प्रशासन कार्यालय कञ्चनपुरका सूचना अधिकारी कृष्णनन्द जोशीले सीमा क्षेत्रमा कडाइ गरिएको बताउँदै भारतबाट फर्किएकाहरूबारे आफूहरूलाई जानकारी नभएको जनाए ।
