[कविता] क्रान्तिकारी बुद्ध

  • डा. राम कृष्ण तिमल्सेना

आज मेरो देशलाई,
नयाँ बुद्ध चाहिएको छ ।
क्रान्तिकारी बुद्ध चाहिएको छ ।


Advertisement

राजपाठ बिर्सने,
श्रीमती र छोरा छाड्ने होइन,
देश छाडेर बिदेश जाने पनि होइन,
देशको माटोको टिको लगाएको,
राष्ट्रियता ओढेर,
ओंकारभित्र पौडी खेल्न जान्ने,
मन्त्र मुग्ध,
नेपालभित्र नै बुद्धत्व प्राप्त गर्न सकिन्छ
भन्ने विश्वास बोकेको,
नयाँ बुद्ध चाहिएको छ ।
क्रान्तिकारी बुद्ध चाहिएको छ ।

नेपाली भाषामा ओममणि पद्मेको,
झन्कार निकाल्न सक्ने,
बोलीमा सत्यता भएको,
वचनमा शुद्धता बोकेको,
झूटो आश्वासन रहित,
आगो ओकल्न सक्ने,
पानी पेलेर ऊर्जा निकाल्ने क्षमता बोकेको,
नयाँ बुद्ध चाहिएको छ
क्रान्तिकारी बुद्ध चाहिएको छ ।

सबै राष्ट्रिय भाषा बुझ्ने,
अंग्रेजी र संस्कृत थाह पाएको,
गौरीशंकर हिमाललाई ,
कैलाशको रुपमा देख्ने र पुज्ने,
पशुपतिभक्त,
महाकालीको स्वरूप,
सरस्वती पुत्र,
लक्ष्मीपति,
नयाँ बुद्ध चाहिएको छ
क्रान्तिकारी बुद्ध चाहिएको छ ।

नयाँ नेपालको मार्गचित्र कोर्न सक्ने,
उत्तर र दक्षिणको महत्त्व बुझे पनि,
पूर्व र पश्चिमको अर्थ लगाउन सक्ने,
राष्ट्रियताको केन्द्रमा रमाउने,
बुद्ध चाहिएको छ ।
क्रान्तिकारी बुद्ध चाहिएको छ ।

आकाश र पातालको केन्द्र थाहा पाएको
ठूलो ताल बीचमा
नयाँ कमलको फूल जस्तो,
सधैं फुली रहने,
राष्ट्रिय झण्डा बोकेको,
मन वचन र कर्मले
देशको सेवा गर्न तत्पर,
सगरमाथाको टोपी लगाएको,
नयाँ बुद्ध चाहिएको छ ।
क्रान्तिकारी बुद्ध चाहिएको छ ।

यो देशलाई आज, फेरि पनि,
जनक र जानकीको,
महत्त्व बुझेको,
जानकीलाई वनमा पठाउने होइन
आफूसँगै राखेर राज्य गर्ने,
राजपाठ सम्हाल्ने,
जनतालाई जनार्दन देख्ने,
नयाँ बुद्ध चाहिएको छ
क्रान्तिकारी बुद्ध चाहिएको छ ।

अल्पकालीन स्वप्नमा रमाउने होइन
दीर्घकालीन सोच बोकेको
आत्माको आवाज बुझ्ने
स्वस्थ र समृद्ध मात्र होइन
स्वतन्त्र र समावेशी बुद्ध चाहिएको छ
ओमकार खुलेको
क्रान्तिकारी बुद्ध चाहिएको छ
नयाँ बुद्ध चाहिएको छ । 

कमेन्ट गर्नुहोस्