१४ असार २०८३, आइतबार
पेरिसमा अपार्टमेन्ट भएका एक साउदी राजकुमारले आफ्ना घरेलु कामदारमाथि दासलाई जस्तो अमानवीय व्यवहार गरेको खुलासा भएको छ ।
उनले फिलिपिन्सबाट आएका सात महिलालाई दासी बनाएर राखेका हुन् ।
ती महिलाहरूले सन् २०१९ मा राजकुमार फैसल बिन तुर्की बिन अब्दुल्ला अल साउदविरुद्ध उजुरी गरेका थिए । उनीहरूलाई फ्रान्समा रहेको दासप्रथाविरुद्धको संगठन एस्क्लेभ्ससले सहायता गरेको थियो ।
कामदार महिलाहरूको अनुहारमा आफ्ना बालबालिकालाई राजकुमारले थुक्न लगाउने गरेका थिए । कुनै बच्चा रोएको देखेमा कामदारहरूलाई कठोर सजाय दिने गरिएको थियो ।
राजकुमार फैसलविरुद्ध मानव तस्करीको केसमा अनुसन्धान चलिरहेको छ ।
उनले आफू र आफ्नी पत्नी सुत्न जानुअघि कामदारहरूलाई जागै रहन बाध्य बनाउने गरेको अनि राति जुनसुकै बेलामा पनि बोलाउने गरेको उनीहरूले बताए ।
अनि भोलिपल्ट बिहान बच्चाहरू ७ बजे उठ्दा कामदारहरू पनि जागै रहनुपर्ने अपेक्षा गरिन्थ्यो ।
कामदार महिलाहरूलाई राजकुमार र उनकी पत्नीको जुठोपुरो खान बाध्य पारिने र धेरैजसो समय खानै नदिने गरिएको पाइएको छ ।
भोकले गर्दा महिलाहरू रोएर बस्न बाध्य भएको पनि भेटिएको छ ।
