०८ साउन २०८३, शुक्रबार
दक्षिण कोरियाले कोभिड-१९ विरुद्धको खोप गर्भवती र १२-१७ वर्षका बालबालिकालाई पनि लगाइदिने भएको छ । स्वास्थ्य निकायले जनाएअनुसार अर्को महिनादेखि गर्भवती र बालबालिकाले पनि खोप लगाउने छन् ।
यस निर्णयसँगै अक्टोबर १८ देखि शुरू हुने खोप अभियानबाट १२ देखि १७ वर्ष उमेर समूहका २० लाख भन्दाबढी बालबालिका लाभान्वित हुनेछन् ।
गत जुलाइदेखि बालबालिकामा पनि संक्रमण तीव्ररूपमा बढेको पाइएपछि यो अभियान घोषणा गरिएको थियो । अगस्टमा मात्र उक्त उमेर समूहका ३ हजार ५० बालबालिका संक्रमित भएका थिए। त्यसै गरी एक लाख ३६ हजार गर्भवतीहरूले पनि अब पहिलो मात्रा खोप लिनेछन् ।
अध्ययन रिपोर्टअनुसार गर्भवती महिलाहरू संक्रमित हुँदा अन्य भन्दा ६ गुणा बढी जटिलता हुन सक्ने हुन्छ।
यसै गरी स्वास्थ्य निकायले दिएको जानकारी अनुसार स्वास्थ्यकर्मी र अन्य जोखिममा रहेका समूह र ६० वर्ष माथिका समूहलाई अक्टोबर २५ देखि तेस्रो मात्रा अथवा बुस्टर डोज लगाइने भएको छ ।
हालसम्म दक्षिण कोरियाले ७४.२ प्रतिशत जनतालाई खोप लगाइसकेको छ। रासस-सिनह्वा
