२० असार २०८३, शनिबार
स्पेनको स्वायत्त प्रान्त एक्टेमदुराका सभामुख ब्लान्का मार्टिन डेलगाडोको नेतृत्वमा नेपाल भ्रमणमा आएको २४ सदस्यीय प्रतिनिधिमण्डलले आज विश्व सम्पदा सूचीमा रहेको ऐतिहासिक भक्तपुरको सम्पदाको अवलोकन गरेको छ ।
आज साँझ भक्तपुरको दरबार स्क्वायर आइपुगेको स्पेनका प्रदेशमन्त्री, मेयर, व्यापारी सहभागी टोलीलाई भक्तपुर नगरपालिकाका प्रमुख सुनिल प्रजापति, उपप्रमुख रजनी जोशी, वाग्मती प्रदेश सभासदस्य सुरेन्द्रराज गोसाई, रजनी जोशी, सरस्वती वाटीलगायतले स्वागत गरे ।
डेलगाडोसहितको टोली र बागमती प्रदेशका सभामुख सानुकुमार श्रेष्ठलाई नगरप्रमुख प्रजापतिले खादा ओढाएर भादगाउँले टोपी लगाई पुप्पगुच्छा प्रदान गर्दै दरबार स्क्वायर गेटमा स्वागत गरेबम थिए ।
भक्तपुर नगरपालिकाले स्वागतस्वरूप भक्तपुर दरबार स्क्वायर डबलीमा प्रदर्शन गरेको माक प्याँख, नागचा प्याँख र जङ्गली प्याँख नाच सभामुख डेलगाडोको टोलीले रुचिपूर्वक अवलोकन गरे ।
सभामुखको टोलीलाई नगरपालिकाका गौतम लासिवासहितको टोलीले दरबार स्क्वायर, पशुपतिनाथको मन्दिर, टौमढीस्थित पाँचतले मन्दिर क्षेत्रको अवलोकनका क्रममा सम्पदाका बारेमा जानकारी गराएको थियो ।
अपराह्न ४ बजे दरबार स्क्वायर आउने र ६ बजेसम्म भक्तपुरको अवलोकन गर्दै दत्तात्रय मन्दिरसम्म अवलोकन गराउने कार्यक्रम तय भए पनि टोली ५ः१० मा मात्रै भक्तपुर आइपुगेको र ६ः२० मा फर्केपछि दत्तात्रयसम्म नपुगी टौमढीबाटै बिदाइ गरिएको नगरप्रमुख प्रजापतिले जानकारी दिए ।
बागमती प्रदेशसभाका सभामुख श्रेष्ठको निमन्त्रणामा सभामुख डेलगाडोको नेतृत्वमा २४ सदस्यीय प्रतिनिधिमण्डल आगामी १६ गते स्पेन प्रस्थान गर्ने गरी छ दिने नेपाल भ्रमणमा आज काठमाडौँ आइपुगेको हो ।
