ऊर्जा, जलस्रोत तथा सिँचाइ मन्त्री पम्फा भुसालले ठेकेदार र कर्मचारीको मानसिकताले काम असाध्यै ढिला हुने गरेको बताएकी छन् । 

ललितपुर महानगरपालिका-२२, चुनिखेलस्थित तपस्थली टोल विकास संस्थाले दीपावली, छठ तथा नेपाल संवत् ११४२ को अवसरमा आयोजना गरेको शुभकामना आदानप्रदान कार्यक्रम उनले सडक, पूर्वाधारलगायतका काममा अस्वभाविक ढिलाइ भएकोमा असन्तुष्टि व्यक्त गरेकी हुन् । 

ललितपुर क्षेत्र नं. ३ की प्रतिनिधि सभा सदस्य समेत रहेकी मन्त्री भुसालले नख्खु-भैँसेपाटी-चुनिखेल-छम्पी-टीकाभैरव सडक विस्तार र स्तरोन्नतिको काम वर्षाैंअघि शुरू भए पनि ठेकेदारको लापरवाहीका कारण अलपत्र परेको उल्लेख गरिन् । 

‘मेरै पहलमा टिप्परका लागि नख्खु कोरिडोरको सडक खोलिएको हो, जहाँ टिप्पर मात्र चल्छ,’ उनले भनिन्, ‘विभिन्न आयोजनामा बजेट पारेर यस क्षेत्रको विकासमा पहल गरेको छु, विडम्बना हाम्रा ठेकेदार र कर्मचारीको मानसिकताले काम असाध्यै ढिला हुने गरेको छ ।’

सो कार्यक्रममा तपस्थली टोल विकास संस्थाका सचिव कृष्ण गुरागाईंले त्यहाँको वस्तुस्थितिबारे मन्त्रीलगायतका अतिथिहरूलाई जानकारी गराएका थिए । आफूहरू देशका विभिन्न भागबाट बसाइँ सरेर उक्त स्थानमा आएको उल्लेख गर्दै उनले स्थानीय सरकारलाई त्यहीँकै स्थानीय वासिन्दा सरह व्यवहार गर्न आग्रह गरेका थिए । 

कार्यक्रममा बागमती प्रदेशका सांसद राजकाजी महर्जनले विगतमा कर्णालीमा जाने बजेट यस क्षेत्रमा पार्न सफल भएको बताए । ‘झण्डै १८ करोड रूपैयाँ हरेक वर्ष महानगरपालिकामा पठाएका छौं, यो रकम वडामा पनि आउँछ,’ उनले भने, ‘यस क्षेत्रकाे विकासका लागि हामी पनि सकारात्मक छाैं ।’

कार्यक्रममा ललितपुरका प्रमुख जिल्ला अधिकारी घनश्याम उपाध्यायले स्थानीयहरूसँग समन्वय र सहकार्य गरेर अगाडि बढ्न आफू सधैं सकारात्मक रहेको उल्लेख गरे । त्यसै गरी ललितपुरका प्रहरी प्रमुख किरण बज्राचार्यले छम्पी-चुनिखेल-भैँसेपाटी-नख्खु रूटमा टिप्पर आवतजावत बढ्न थालेको बारेमा आफूहरू पूर्ण जानकार रहेको उल्लेख गर्दै टिप्पर व्यवस्थापनका लागि पहल भइरहेको उल्लेख गरेकी थिइन् । 

ललितपुर महानगरपालिका-२२ का वडाध्यक्ष आमवीरराज शाक्यले स्थानीय सरकारले आफ्नो वडाका सबै नागरिकलाई समान व्यवहार गर्ने उल्लेख गर्दै आगामी दिनमा पनि स्थानीयका समस्या समाधानमा केन्द्रित रहने बताए । 

वडा नं. २२ का सदस्य सागर तुलाधरले खानेपानीलगायत अन्य विकासका काममा समझदारीमै  काम भइरहेकाे उल्लेख गरे ।