१७ असार २०८३, बुधबार
भारतका प्रधानमन्त्री नरेन्द्र मोदीले आइतवार रेडियो प्रोगम मन की बातमा अस्ट्रेलियाली महिला जगततारिणीको चर्चा गरेका छन् ।
वृन्दावनमा लामो समय बिताएकी जगततारिणीको कृष्णभक्तिलाई मोदीले प्रशंसा गरेका हुन् ।
पश्चिमी अस्ट्रेलियाको पर्थमा जगततारिणीले सेके्रड इन्डिया ग्यालरी बनाएकी छन् ।
वृन्दावनमा १३ वर्ष बिताएर अस्ट्रेलिया पुगेकी जगततारिणीले कृष्णभक्तिमा वशीभूत भएर पर्थमा वृन्दावन बनाएकी छन् ।
त्यहाँ पुग्नेहरूले भारतका तीर्थहरू र विविध संस्कृतिको झलक देख्न पाउँछन् । भगवान् श्रीकृष्णले गोवर्धन पर्वतलाई कान्छी औंलामा उठाएको कलाकृति पनि त्यहाँ राखिएको छ ।
मेलबोर्नमा जन्मेर हुर्केकी जगततारिणी थिएटर र कलाकर्मका लागि सिड्नी गएकी थिइन् । संसार घुम्ने क्रममा उनी सन् १९७० मा वृन्दावन पुगेकी थिइन् । त्यहाँ उनी इस्कोनसँग जोडिइन् ।
सन् १९९६ मा उनी अस्ट्रेलिया फर्केपछि त्यहाँ नै कृष्णभक्तिको दियो जलाइरहेकी छन् ।
