१७ असार २०८३, बुधबार
विश्व रक्तदाता दिवसको अवसरमा नेपाल मानव धर्म सेवा समितिले देशव्यापी बृहत् रक्तदान कार्यक्रम आयोजना गरेको छ । समितिले देशभरका आश्रम र अन्य ठाउँमा रक्तदान कार्यक्रम आयोजना गरेको थियो ।
मंगलबार साँझसम्म काठमाडौं उपत्यकामा १०९ जना र सर्लाहीको हरिवनमा ४९ जना रक्तदाताले रक्तदान गरेको समितिको केन्द्रीय कार्यालयले जानकारी दिएको छ ।
काठमाडौंमा गत शनिबार समितिको केन्द्रीय कार्यालय गौशालाको प्राङ्गणमा ६० जनाले रक्तदान गरेका थिए । मंगलबार ललितपुर गोदावरी नगरपालिकाको वडा नम्बर– १ दमाईटार बडा कार्यालयमा ४३ जनाले रक्तदान गरेका छन् ।
काठमाडौंका अस्पतालमा रगत अभाव भएपछि समितिले आकस्मिक रक्तदान कार्यक्रम आयोजना गर्दै आएको छ । काठमाडौंमा अत्याधिक महिलालाई रक्तदान गराएको भन्दै रक्तसञ्चार केन्द्रबाट नेपाल मानव धर्म सेवा समिति पुरस्कृत भइसकेको छ ।
रक्त समूह पत्ता लगाउने वैज्ञानिक डा. कार्ल ल्यान्डसटाइनरको जन्मदिन जुन १४ को सम्झनामा सन् २००४ देखि विश्व रक्तदाता दिवस मनाउन शुरु गरिएको हो ।
