०७ साउन २०८३, बिहीबार
केहीदिन पहिले झण्डै दैनिक हजारको हाराहारीमा पुगेको कोरोना संक्रमितको संख्या घट्न थालेको छ । पछिल्लो दुई दिनयता कोरोना संक्रमितको संख्या कम हुँदै गएको हो । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ४५५ जना नयाँ संक्रमित थपिएका छन् । मन्त्रालयले कूल ४ हजार ८ सय २९ नमूना परीक्षण गर्दा उक्त संख्यामा नयाँ संक्रमित थप भएको जानकारी दिएको छ ।
मन्त्रालयका अनुसार २ हजार ३ सय ८ नमूना पीसीआर विधिबाट परीक्षण गर्दा ३ सय ५ र २ हजार ५ सय २१ नमूना एण्टीजेन विधिबाट परीक्षण गर्दा १ सय ५० जनामा संक्रमण पुष्टि भएको हो । योसँगै सक्रिय संक्रमितको संख्या ५ हजार ४ सय ३५ पुगेको छ ।
पछिल्लो २४ घण्टामा कोरोना संक्रमणबाट २ जनाको मृत्यु भएको मन्त्रालयले जनाएको छ ।
संक्रिय संक्रमितमध्ये ५ हजार २ सय ४६ जना होम आइसोलसनमा, १ सय ८९ जना संस्थागत आइसोलेसन, ६५ जना आईसीयू र २ जनाको भेन्टिलेटरमा राखी उपचार भइरहेको छ ।
त्यसैगरी विगत २४ घण्टामा ३ सय २ जना कोरोना संक्रमणबाट निको भएर घर फर्किएका छन् ।
