नेपाली कांग्रेसका पूर्वमहामन्त्री डा. शशांक कोइरालाले नेपालका चिकित्सकहरू धेरै पैसामुखी भएको भन्दै असन्तुष्टि जनाएका छन् । बिहीवार विपी प्रतिष्ठानले आयोजना गरेको कार्यक्रममा उनले सेवामुखी हुनुपर्ने डाक्टरहरू पैसामुखी भएको भन्दै दुःख व्यक्त गरेका हुन् । 

आफूले धेरै डाक्टरहरुलाई अध्यापन गराएको उल्लेख गर्दै डा. कोइरालाले अहिले डाक्टर राम्रा तर अप्रेशन गर्न लागेको बिरामीलाई पैसा दिएपछि मात्रै अप्रेशन गर्छु भन्ने किसिमका भएको बताए । उनले आफूलाई पीडा हुँदा पनि अरूको सेवा गर्नु नै डाक्टरी पेशा भएकोले फलको आश नगरी सेवा गरेर अघि बढ्न सुझाव दिए । 

‘जीवन भनेको प्रयत्न हो, फलको चिन्ता गर्नु हुँदैन, प्रयत्न गरिराख्ने हो । मैले धेरै डाक्टरहरुलाई पढाएँ । १६ वर्ष कटिसकेको डाक्टरको चरित्रमा परिवर्तन गर्न नसकिने रहेछ’, उनले भने, ‘राम्रो डाक्टर बनाएँ । तर उनीहरू के गर्छन् भने बिरामीलाई टेबलमा राखेपछि भन्छन्, तिम्रो पेट म चिर्छु तर तिमीले ६० हजार रुपैयाँ मलाई दिनुपर्छ । त्यस्तो डाक्टर बनाएँ, डाक्टर राम्रा तर चरित्र नभएका । आफूलाई पीडा हुँदा पनि अरूको सेवा गर्नु नै डाक्टरी पेशा हो ।’