काठमाडौं–२ बाट प्रतिनिधिसभा सदस्यको उम्मेदवार रहेकी राष्ट्रिय प्रजातन्त्र पार्टी (राप्रपा)की नेतृ कुन्तीदेवी पोख्रेलले विजयी उम्मेदवार सोविता गौतमलाई बधाई दिदै आफू राजनीतिक जीवन सक्रिय रहने बताएकी छिन् । 

काठमाडौं–२ बाट राष्ट्रिय स्वतन्त्र पार्टीकी उम्मेदवार सोविता गौतम विजयी भएकी छिन् । गौतमले १५ हजार २२९ मत ल्याएर विजयी हुँदा एमालेका मणिराम फुयालले ११ हजार ५५५ मत ल्याएर दोस्रो भए । 

राप्रपाकी पोख्रेलले ११ हजार १४ मत ल्याएर सत्तारूढ गठबन्धनकी उम्मेदवार माओवादी केन्द्रकी नेतृ ओनसरी घर्तीलाई चौथौं स्थानमा पुर्‍याएकी छिन् । 

पोखरेलले बुधबार फेसबुकमा स्टेटस लेख्दै आफू संसदबाहिरबाटै संसद गर्जिने भनेकी छन् । ‘गलत काममा खबरदारी र सही काममा पूर्ण साथ रहनेछ । म संसद बाहिर बाट नै संसदमा गर्जने छु’, पोख्रेलले भनेकी छिन् ।

गौतमलाई बधाई दिदैं पोख्रेलले भनेकी छन्, ‘काठमाडौं क्षेत्र–२ बाट विजयी हुनु भएको सोबिता गौतमलाई हार्दिक बधाई र शुभकामना । आशा गर्छु, हजुरले यस क्षेत्रमा भनेको झै राम्रो काम गर्नु हुनेछ ।’

यस्तो छ कुन्ती पोख्रेललको फेसबुक स्ट्याटस–

यो निर्वाचनमा उम्मेदवार हुँदै गर्दा मैले धेरै नयाँ अनुभव बटुल्ने र शिक्षा लिने अवसर प्राप्त गरें । मैले पाएको माया, साथ,र विश्वासको लागि म आभारी छु । जीवनमा हार,जीत हुन्छ तर महत्वपूर्ण भनेको आत्मबल हार्नु हुँदैन । मेरो आत्मबल पहिलाकोभन्दा बढेको छ । मैले पनि ठुलो साथ, सहयोग कमाएकी छु यो साथको म सधै ईमान्दार रहनेछु । 

काठमाडौं क्षेत्र नं २ बाट विजयी हुनु भएको सोबिता गौतम ज्यू लागि हार्दिक बधाई र शुभकामना । आशा गर्छु हजुरले क्षेत्रमा भनेकोझै राम्रो काम गर्नु हुनेछ । मेरा चुनावी अनुभवले जीवनको नयाँ कथा सिकेको छु, यो कथाको हरेक क्षण जीवनमा उतार्ने छु । आगामी दिनको राजनीतिक एवं सामाजिक सेवाको यात्रामा यी सबैको सदुपयोग गर्दै आफूमा अझ सुधार, विकास गर्ने प्रण गर्दछु । यस दौरान थुप्रै नयाँ साथीहरू, सम्बन्धहरू बने । यी सबैलाई आगामी दिनहरूमा पनि जीवन्त राखिरहनेछु । 

राजनैतिक यात्रा लामो छ । मेरो सुरुवातमै  हजुरहरुको भरोसाले दिएको आत्मबल अमूल्य छ । काठमाडौं–२ का स्थानीय आमाबुवा, दाजुभाइ साथिहरुसँग निरन्तर जोडिएर क्रियाशील रहिरहनेछु । गलत काममा खबरदारी र सही काममा पूर्ण साथ रहनेछ। म संसद बाहिर बाटनै संसदमा गर्जने छु । सदैव हजुरहरुको यसरी नै माया र साथ पाइयोस्, म निरास हजुरहरुलाइ बनाउने छैन ।

आगामी दिनका यात्रा झन विषेश हुनेछन । यात्राको सुरुवात हो गन्तव्य नपुगी म पछी पर्दिन ।