२८ जेठ २०८३, बिहीबार
सत्ता गठबन्धनसँग सिट बाँडफाँटमा चित नबुझेपछि जनता समाजवादी (जसपा)ले नेकपा एमालेसँग तालमेल गर्यो । तालमेलमा सुनसरी क्षेत्र नम्बर १ र मोरङ क्षेत्र नम्बर ५ जसपाको भागमा पर्यो । माेरङ ५ जसपाको भागमा परेपछि नेकपा एमालेका प्रदेश कमिटी सदस्य योगेन्द्र मण्डल ‘जोगी सर’ले एमाले छाड्ने घोषणा गरे । उनले पार्टीले तालमेलका नाममा जसपालाई टिकट दिएपछि आँट गरेर स्वतन्त्र उम्मेदवारी दिए । उनले ‘चापाकल’ चुनाव चिह्न पाए ।
चुनाव चिह्न पाएपछि उनी घरदैलो अभियानमा लागे । उपेन्द्र यादवले चुनाव जितेको उक्त क्षेत्र उनका लागि सहज भने थिएन । उनलाई एमालेका एकाथरी नेताहरूले उम्मेदवारी फिर्ता लिन दबाब दिए भने एकातर्फका नेताले सघाउने घोषणा गरे । उनलाई एमालेकै नेता तथा कार्यकर्ताले सघाए ।
‘जोगी सर’ उपनामले चिनिएका मण्डलका लागि चुनाव जित्ने आधार भने शिक्षण पेशा बन्यो । उनले गाउँ समाजका विपन्न बालबालिकालाई निःशुल्क ट्युसन पढाएका थिए । बिएस्सी सकेर घर फर्किएपछि उनले गरिब तथा विपन्न बालबालिकालाई सघाएका थिए । ट्युसन पढाउने विद्यार्थीहरूले उनलाई ‘जोगी सर’ भन्थे ।
२०५१÷२०५२ साल तिर उनले ट्युसन पढाएका थिए । विद्यार्थीहरूले उनको नाम ‘जोगी सर’ भनेर राखेका थिए । त्यही बेलादेखि उनी ‘जोगी सर’ उपनामले चिनिएका थिए । उनका लागि त्यही काम सबैभन्दा ठूलो निर्वाचन जित्ने आधार बन्यो । त्यति बेला निःशुल्क ट्युसन पढाएका विद्यार्थीहरू गुण तिर्ने भन्दै आफ्नो प्रचारमा हिँडेका कारण चुनाव जित्न सहज बनेको जोगी सर बताउँछन् ।
जीवन विकास समाजले लघुवित्त, अस्पताल, डेरी, पिउने पानी, बाल विकास केन्द्र, कृषि आयोजनालगायतका प्रोजेक्ट चलाइरहेको छ । उनले जीवन विकास समाजको पनि नेतृत्व गरिरहेका छन् । उक्त जिम्मेवारीले पनि जोगी सरलाई निर्वाचन जित्न सहज भयो ।
२५ वर्ष अघि जीवन विकास लघुवित्त वित्तीय संस्था खोलेर उनी जनता नजिक भएका थिए । जीवन विकासले २४ जिल्लामा कार्यक्षेत्र विस्तार गरेको छ । लघुवित्तमा तीन लाख बढी सदस्य छन् ।
नागरिकको जीवनस्तर उकास्नका लागि सहयोग गर्न भन्दै उनले स्थापना गरेको जीवन विकासले लघुवित्तसँगै स्वास्थ्य शिक्षाको क्षेत्रमा पनि काम गरिरहेको छ । तीन सय बेडको सुलभ अस्पताल सञ्चालनका संरचना निर्माणसमेत गरिरहेको छ । उनले ५ वर्षदेखि नै चुनावमा उठ्ने तयारी गरेका थिए ।
२०७४ सालपछि मात्र एमालेको राजनीति शुरुका गरेका जोगी सरले टिकट नपाएपछि विद्रोह गरे । उनको विद्रोहले अन्त्यमा सांसदसम्मको बाटो देखायो । अब उनी ‘माननीय जोगी सर’ कहलिने छन् ।
जोगी सरले मत गणनामा शुरुदेखि नै लगातार अग्रता लिए । अन्ततः २१ हजार ८२० मत ल्याएर उनी विजयी भए । उनका निकटतम प्रतिद्धवन्द्धी माओवादी केन्द्रका शिवकुमार मण्डले १७ हजार ४ सय ८६ मत प्राप्त गरे । जनता समाजवादी (जसपा) का राजकुमार यादवले १७ हजार ३९० मत पाए । यादवलाई उनको पार्टी एमालेले समेत समर्थन गरेको थियो ।
पार्टीले टिकट नदिएपछि विद्रोह गरेर स्वतन्त्र उम्मेदवारी दिएका मण्डलले ५ दलीय गठबन्धनका उम्मेदवार शिवकुमार मण्डल र एमाले–जसपाका संयुक्त उम्मेदवार राजकुमार यादवलाई पराजित गर्न सफल भए ।
