भारतीय चर्चित अभिनेता विवेक ओवरायले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटेका छन् । बुधवार परिवारसहित नेपाल भ्रमणमा आएका विवेकले बिहीवार प्रचण्डलाई उनकै निवास खुमलटारमा पुगेर भेटेका हुन् । 

प्रचण्डले नायकद्वयलाई स्वागत गर्दै भादगाउँले टाेपी लगाइदिएका थिए । 

विवेकसँगै भारतीय चरित्र अभिनेता सुरेश ओवराय पनि खुमलटार पुगेका थिए । अभिनेताद्वय र प्रचण्डबीच भेटवार्ता भएको प्रचण्डपुत्री गंगा दाहालले जानकारी दिएकी छन् । भेटको तस्वीर फेसबुकमा शेयर गर्दै गंगाले लेखेकी छन्, ‘भारतीय सिनेमाका चर्चित चरित्र अभिनेता सुरेश ओवराय र युवापुस्ताका चर्चित नायक विवेक ओवरायले हाम्रो पार्टीका श्रदेय अध्यक्ष कमरेड प्रचण्डसँग खुमलटारमा भेटघाट गर्नुभएको छ ।’

परिवारसहित नेपाल भ्रमणमा आएका विवेकले पशुपतिनाथ, चन्द्रागिरिलगायतका धार्मिक तथा पर्यटकीय स्थलको भ्रमण गरेका छन् ।