०८ असार २०८३, सोमबार
सामाजिक सञ्जाल ट्विटरका मालिक इलोन मस्कले कुनै मूर्ख मान्छेले जिम्मेवारी नलिउन्जेलसम्म कम्पनीको सीईओ बनिरहने घोषणा गरेका छन् ।
प्रमुख कार्यकारीको भूमिकाबाट बिदा लिऊँ कि नलिऊँ भनी मस्कले ट्विटरमा गरेको पोलमा बहुमतले बिदा लिने पक्षमा मत दिएपछि मस्कले राजीनामा दिने भएका हुन् । तर उत्तराधिकारी खोज्नका लागि समय लाग्न सक्ने उनले स्वीकार गरे ।
‘यो काम लिने कुनै मूर्ख फेला पार्नेबित्तिकै म सीईओ पदबाट राजीनामा दिन्छु । त्यसपछि म सफ्टवेयर र सर्भर टीम मात्र चलाउँछु,’ मस्कले मंगलवार एक ट्वीटमार्फत घोषणा गरे ।
मस्कले सक्रियतापूर्वक सीईओको आकांक्षीको खोजी गरिरहेको सीएनबीसीले खबर दिएको छ ।
आइतवार मस्कले गराएको पोलमा १ करोड ७० लाख प्रयोगकर्ता सहभागी थिए । तीमध्ये लगभग ५७.५ प्रतिशतले मस्कलाई सीईओ पदबाट राजीनामा दिने पक्षमा मत दिए ।
सोमवार मस्कले ट्विटरका नीतिनियम परिवर्तनमा आफ्नो विचार प्रस्तुत गर्न ट्विटर ब्लु सब्स्क्राइबरहरू मात्र समर्थ हुने घोषणा गरेका थिए ।
