०३ साउन २०८३, आइतबार
नवनियुक्त स्वास्थ्य राज्यमन्त्री डा. तोसिमा कार्कीले पैसा अभावमा उपचार नपाएर कसैले ज्यान गुमाउनु पर्ने अवस्था आउन नदिने बताएकी छिन् ।
संविधानले परिकल्पना गरेको मौलिक हकलाई वास्तविक रूपमा कार्यान्वयनमा ल्याउने प्रतिबद्धता उनले जनाइन् ।
रामशाहपथस्थित मन्त्रालयमा मंगलवार कार्यभार सम्हाल्दै राज्यमन्त्री कार्कीले सरकारी अस्पतालको न्यूनतम् सेवा मापदण्ड बनाएर कार्यान्वयनमा ल्याउने बताएकी हुन् ।
‘हामीले भर्खरै देश, जनता र ईश्वरको नाममा शपथ खाएर आएका छौं । पैसाको अभावले उपचार नपाएर ज्यान गुमाउनुपर्ने अवस्थालाई निवारण गर्न चाहन्छौं,’ उनले भनिन् ।
मन्त्री कार्कीले आज दुईवटा निर्णयमा हस्ताक्षर गरेकी छिन् । ‘आँखा उपचार सेवालाई विकेन्द्रीकरण गर्ने पहिलो निर्णय गरेका छौं,’ कार्कीले भनिन्, ‘दोस्रोमा न्यूनतम् सेवा मापदण्ड आधारभूत स्वाथ्य चौकी, जिल्ला र क्षेत्रीय अस्पतालमा हुनुपर्ने मापदण्ड के हुन्, त्यो सेट गरेर कार्यान्वयन गर्ने (भन्ने छ) ।’
एमालेका पदम गिरीले सम्हालेको स्वास्थ्य मन्त्रालयमा पेशाले चिकित्सक रहेकी कार्की राज्यमन्त्री बनेकी हुन् ।
