अभिनेत्री पूजा शर्माले रेखा थापासँग फिल्म खेल्ने पाउनु सपनाजस्तो लागिरहेको बताएकी छिन् ।

रेखा फिल्मसको ब्यानरमा निर्माण हुने आगामी फिल्ममा पूजा शर्मा अनुबन्धित भएकी छिन् ।

ज्ञानेन्द्र देउजाले निर्देशन गर्ने फिल्ममा रेखा, पूजासँगै अन्य कलाकारहरूको अभिनय रहनेछ ।

फिल्ममा अनुबन्धित भएसँगै पूजाले फेसबुकमा खुशी सेयर गर्दै आफ्नो प्रिय अभिनेत्रीसँग पर्दा सेयर गर्न पाउँदा हर्षित रहेको बताएकी छिन् ।

उनले रेखाको अभिनयबाट प्रभावित भएर आफू फिल्म क्षेत्रमा आएको उल्लेख गर्दै भनेकी छिन्, ‘रेखा दिदीको साथमा नयाँ फिल्ममा काम गर्दै गर्दा धेरै कुरा सिक्नेछु भन्ने लागेको छ ।’

उनले निर्देशक देउजाको निर्देशनको मात्र नभइ व्यवहारले समेत आफूलाई प्रभावित बनाएको बताएकी छिन् ।

‘प्रिय, ज्ञानेन्द्र दाइको निर्देशनमा रेखा दिदीसँग एउटै पर्दामा देखिनु मेरा लागि कही कतै सपना नै हो कि जस्तो पनि लाग्दैछ’ – पूजाले भनेकी छिन् ।

यो फिल्म आफ्ना लागि सधैं विशेष हुने उनले बताएकी छिन् ।

आगामी वैशाखको पहिलो साताबाट फिल्मको छायाँकन सुरु हुने तयारी छ ।