साङ्गीतिक क्षेत्रकी नव प्रतिभा सिम्रन परियार फेरि काठमाडौं आएर गायनमा व्यस्त बनेकी छन् । यसैसाता काठमाडौं आएकी उनले धमाधम गीत रेकर्ड गराइरहेकी छन् । 

बिहीवार गायक प्रमोद र सिम्रनको युगल स्वरमा गीत रेकर्ड भएको छ । सुनील बिसीको शब्द एवं संगीत, विशाल निरौलाको एरेन्ज रहेको उक्त गीत रेकर्डिङका तस्वीरहरू प्रमोदले फेसबुकमा पोष्ट गरेका छन् । 

सिम्रनले गायक अर्जुन सापकोटासँग पनि गीत गाएकी छन् । उक्त गीत शनिवार सार्वजनिक गर्ने तयारी छ । त्यस्तै, गायक एवं संगीतकार श्रीधर अधिकारीले पनि सिम्रनसँग दोस्रो पटक साङ्गीतिक सहकार्य गरेका छन् । 

‘संसारकी प्यारी आमा’बोलको उक्त गीत शुक्रवार दिउँसो सार्वजनिक हुँदैछ । बागलुङकी १८ वर्षीय सिम्रन युट्युब अन्तवार्ताको गायकीका कारण एकाएक भाइरल भएकी थिइन् । सामाजिक सञ्जालमा प्रशंसा पाएपछि उनले काठमाडौं आएर गीत रेकर्ड गराउने अवसर पाएकी थिइन् । 

सञ्चारकर्मी भोजराज थापाले उनलाई काठमाडौं ल्याएर गीत रेकर्डिङको चाँजोपाँचो मिलाएका थिए ।

यसअघि एकसाता काठमाडौं रहँदा सिम्रनले १४ वटा गीतमा स्वर दिएकी थिइन् । ​जसमध्ये धेरै गीतहरूले चर्चा पाएका थिए ।​ 

त्यसबेला गीतका अफरहरू लगातार आइरहे पनि पढाइ छुट्ने भएकाले अफर आएका गीतहरू छाडेर उनी बागलुङ फर्किएकी थिइन् ।

यसपटक फेरि काठमाडौं आएर गायनमा व्यस्त बनेकी उनी बागलुङमै कक्षा १२ मा अध्ययनरत छिन् ।