०७ साउन २०८३, बिहीबार
नेपाली वाङ्मयमा अलग्गै विशिष्ट स्थान बनाएका वरिष्ठ साहित्यकार गोपी मैनालीको कथासङ्ग्रह 'विशृङ्खलित सपना' लोकार्पण हुने भएको छ ।
यही साउन १२ गते शनिबार (भोलि) काठमाडौंमा विशेष समारोहमा नेपाल प्रज्ञा प्रतिष्ठानका पूर्वकुलपति कवि वैरागी काइँलाले उक्त कथासङ्ग्रहको लोकार्पण गर्नेछन् ।
निजात्मक निबन्धमा लक्ष्मीप्रसाद देवकोटा र शंकर लामिछाने पछि शीर्ष पहिचान भएका मैनालीका अवसाद अभिनयी, अपेक्षा र अनुभूति र घाउ आफैंलाई दुख्छ निबन्ध सङ्ग्रह, आँखाभरि रमिता मनभरि बेदाना नियात्रा साहित्य र युगकवि सिद्धिचरण : कृति र प्रवृत्ति विश्लेषण, अभिव्यञ्जना यात्राप्रति र रमेश विकल : समालोचनात्मक अन्वेषण समालोचनाहरू प्रकाशित भइसकेका छन् ।
आफ्ना सिर्जनामा आफ्नै समालोचकीय मान्यताको प्रयोग गर्ने मैनालीको प्रवृत्ति छ ।
निबन्धमा कल्पना, चिन्तन र भावको निबन्ध उच्छाल उरल्ने र समालोचनालाई सिर्जनामाथिको सिर्जना भनी कला मूल्य र प्रयोगको सापेक्ष्यमा आयामिक विवेचना गर्ने मैनालीको कथाले कस्तो स्वाद पस्कने हो, पाठकहरू त्यसको व्यग्र प्रतीक्षामा छन् ।
