२९ असार २०८३, सोमबार
उपप्रधान एवं अर्थमन्त्री विष्णुप्रसाद पौडेलले नेपाल स्टक एक्सचेन्ज (नेप्से)को कार्यालयमा पुगेर शेयर बजारमा भइरहेको घटबढप्रति चासो देखाएका छन् । बुधवार भद्रकालीस्थित नेप्से कार्यालयमा पुगेर उनले शेयर बजार ‘अप एन्ड डाउन’ हुनुको कारण खोजेका हुन् ।
अर्थमन्त्री पौडेलले नेप्सेको तीव्र उतारचढाव कहिलेसम्म हुन्छ भन्ने विषयमा कर्मचारीहरूसँग जिज्ञासा राखेको उनको सचिवालयले जनाएको छ । नेप्सेले प्रयोग गरिरहेको प्रविधिमा थप वा सुधार के गर्न सकिन्छ भन्ने विषयमा पनि उनले छलफल गरेका थिए ।
‘नेप्सेको विन्दु कहिले २ हजार १०० त कहिले ३ हजारसम्म पुगिरहेको छ । कारोबार पनि कहिले २० अर्बभन्दा बढी हुन्छ भने, कहिले ८/९ अर्ब हुन्छ । यो कहिलेसम्म र कहाँसम्म पुग्छ होला ?’, अर्थमन्त्री पौडेलले प्रश्न गरे ।
धितोपत्र बोर्ड र नेप्सेले एक आपसमा समन्वय गरेर जानुपर्नेमा मन्त्री पौडेलले जोड दिए । नेप्सेलाई प्रभाव पार्ने प्रवृत्तिलाई नियन्त्रण गर्न आवश्यक रहेको उनले बताए ।
‘हामीले लगानीकर्ताको सुरक्षालाई हेर्नुपर्ने हुन्छ । अहिले विभिन्न प्रकृतिका अनियमितता भएको कुरा हामीले देखिरहेका छौँ । त्यसलाई कसरी कम गर्न सकिन्छ भन्ने कुरामा पनि नेप्सेले ध्यान दिनुपर्छ,’ उनले भने, ‘अहिले नेप्सेलाई थप आवश्यक प्रविधिमा समेत लैजान सकिन्छ । शेयर बजारलाई प्रभाव पार्ने प्रवृत्तिलाई नियन्त्रण गर्न आवश्यक छ । यी विषयमा पनि ध्यान पुर्याउनु पर्यो । ’
