२५ जेठ २०८३, सोमबार
राष्ट्रपति रामचन्द्र पौडेलले हिन्दू तथा नेपालीहरूको महान् चाड दशैँको मुख्य दिन विजया दशमीका अवसरमा सर्वसाधारणलाई टीका लगाइदिएका छन् ।
आज (शनिवार) दिउँसो ३ बजे प्रधानमन्त्री केपी शर्मा ओली, उपप्रधानमन्त्रीद्वय, मन्त्री, सांसद, संवैधानिक अङ्गका प्रमुख एवं सदस्यलाई नवदुर्गाको प्रसादस्वरुप टीका र जमरा प्रदान गरिसकेपछि राष्ट्रपति पौडेलले इच्छुक सर्वसाधारणलाई पनि टीका लगाउन शुरू गरेको राष्ट्रपतिको स्वकीय सचिवालयले जनाएको छ ।
राष्ट्रपतिको हातबाट टीका र जमरा ग्रहण गर्ने इच्छा राखेर लाममा बस्ने सबैलाई आज राष्ट्रपति पौडेलले टीका लगाइदिने कार्यक्रम छ । राष्ट्रपतिबाट टीका र जमरा ग्रहण गर्न सयौँ मानिस लाममा बसेको जनाइएको छ ।
विजया दशमीका दिन राष्ट्रको अभिभावकका रुपमा राष्ट्राध्यक्षबाट सयौँ नेपालीले टीका र प्रसाद ग्रहण गर्ने गरेका छन् । राजतन्त्रकालमा राजाले निरन्तरता दिएको यो परम्परालाई सङ्घीय लोकतान्त्रिक गणतन्त्र स्थापनापछिका राष्ट्रपतिहरूले पनि निरन्तरता दिँदै आएका हुन् ।
