बाँकेमा बिनाटाउको भेटिएको शवको अनुसन्धानका क्रममा प्रहरीले नयाँ-नयाँ तथ्य फेला पारेको छ ।​

इलाका प्रहरी कार्यालय बाँकेले तालिमप्राप्त कुकुर परिचालन र सीसीटीभीको निगरानीमा घटनाको एक महिनापछि हत्या आरोपीलाई पक्राउ गरेको छ ।

कोहलपुर नगरपालिका– ८ स्थित सरस्वती चोक जाने बाटोमा प्रहरीले २७ भदौमा बिनाटाउकोको शव फेला परेको थियो ।

शुरूमा शवको पहिचान नै भएन । पछि उक्त शव कोहलपुरको नहरटोल बस्ने चन्द्रबहादुर कामीको भएको खुल्यो ।

इलाका प्रहरी कार्यालय बाँकेका प्रमुख डीएसपी धर्मराज भण्डारीका अनुसार कामी सामान्य मजदुरी गरेर गुजारा चलाउँदै आएका व्यक्ति हुन् ।

घटनामा संलग्नताको आशंकामा रोल्पाको माडी गाउँपालिका– ६ का २४ वर्षका अनिल परियारलाई गत मंगलबार मात्रै प्रहरीले पक्राउ गरेको हो ।

डीएसपी भण्डारीका अनुसार परियार जबर्जस्ती करणीसम्बन्धी मुद्दामा २ वर्ष ९ महिना जेलमा बसेर यही असोज १३ गते बाँकेकै नौवस्ता कारागारबाट छुटेका थिए ।

‘टाउको बिनाको शव फेला परेपछि अनुसन्धान त्यति सजिलो थिएन, हामीले नजिकको सीसीटीभी र तालिमप्राप्त कुकुर परिचालन गर्दा कुकुर सेफ्टी ट्याङ्कीतर्फ दौडियो,’ डीएसपी भण्डारीले लोकान्तरसँग भने, ‘ढकनी खोलेर हेर्दा मृतकको टाउको र घटनामा प्रयोग भएको हतियार फेलापर्‍यो ।’ 

उनका अनुसार सीसीटीभी फुटेजमा कामी र परियार दुवै कैद भएका थिए । ‘सीसीटीभी फुटेजमा देखिएको हुलियाका आधारमा परियारलाई हत्या आरोपीको रूपमा पक्राउ गरेका हौं,’ भण्डारीले भने, ‘साइकल चढेर आउजाउ गरेका उनको हाउभाउबाट उनको संलग्नताबारे केही प्रमाण भेटिएको छ ।’

हत्या आरोपी पक्राउ गर्न प्रहरीले एक महिनासम्म प्रहरी निरीक्षकको कमान्डमा १५ जना खटाएको उनले जानकारी दिए । भण्डारीले भने, ‘मृतकको टाउको खोज्न मात्रै १५ दिन लाग्यो ।’

परियार एक आफन्तकोमा गएर लुकेको आशंकापछि खोजतलास गर्दा उनी लुकेको सुराक मिलेको प्रहरीले जनाएको छ । 

प्रहरीले शवको पोस्टमार्टम गरेर पनि आफन्तलाई बुझाइसकेपछि मात्रै परियार पक्राउ परेका हुन् ।

डीएसपी भण्डारीका अनुसार सामान्य विवादमा परियारले कामीको हत्या गरेको देखिन्छ ।

साइकल चढिरहेका बेला सुतिरहेका कामीलाई हल्का छोएको विवादमा दुई जनाबीच झगडा भएको अनुसन्धानबाट खुलेको छ ।

त्यतिबेलै खुर्पा बोकेका परियारले कामीको हत्या गरेको र तत्काल कसैले थाहा नपाओस् भन्ने मनसायले टाउको सेफ्टी ट्यांकीमा लुकाएको अनुसन्धानबाट खुलेको डीएसपी भण्डारीले बताए ।