०५ साउन २०८३, मंगलबार
आगामी चैत २२ गते प्रदर्शनमा आउने चलचित्र ‘बसन्त’को ‘साँझ पर्यो झमक्क’ बोलको गीत सार्वजनिक भएको छ । काठमाडौंमा शनिबार एक समारोहमा गीत सार्वजनिक गरिएको हो ।
गीतमा शब्द/संगीत प्रकाश सपुतको रहेको छ भने स्वर शान्ति श्री परियार र प्रकाश सपुतको छ । चैते दशैंको अवसर पारेर प्रदर्शनको तयारीमा रहेको चलचित्रको निर्माणमा आफू र आफ्नो टिमले निकै मेहनत गरेको प्रकाशले बताए । आफूले सोचेको र खोजेकै जस्तो नतिजा निस्कनेमा विश्वस्त रहेको चलचित्रका निर्देशक समेत रहेका सपुतले बताए ।
गायक तथा निर्देशक सपुतको जन्मथलो बागलुङका अलवा काठमाडौं र तराईका विभिन्न ठाउँमा चलचित्रको छायांकन गरिएको छ । चलचित्रमा प्रकाश सपुतसहित स्वस्तिमा खड्का, प्रभात पाल ठकुरी, खड्क बहादुर पुन (खबपु), शिवांशी श्री, अनुप बराल, कमलमणि नेपाल, प्रकाश घिमिरे लगायतका कलाकारको अभिनय छ ।
यो सोसल ड्रामा चलचित्रको कथा, पटकथा र संगीत पनि सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा चलचित्रले भन्ने छ ।
गलबन्दी प्रोडक्सनको प्रस्तुति रहेको चलचित्रको कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन् । चलचित्रलाई सुसन प्रजापतिले खिचेका हुन् ।
हेर्नुहोस् गीत :
