०२ साउन २०८३, शनिबार
रसुवाको स्याफ्रुबेँसीमा आयोजना गरिएको एक दिवसीय निःशुल्क स्वास्थ्य शिविरमा एक सय पाँच महिलाको पाठेघर परीक्षण गरिएको छ ।
लाङटाङ लिरुङ अस्पतालद्वारा आयोजित शिविरमा १२ जनामा पोजेटिभ भेटिएको डा. जीवन तामाङले बताए ।
समस्या देखिएका बिरामीलाई आवश्यक परामर्श दिन थालिएको र स्थानीय स्तरमा उपचार हुन नसक्नेलाई जोखिमको अवस्था हेरी बाहिर पठाउन तयार भइरहेको उनले बताए । परीक्षणका लागि स्त्रीरोग विशेषज्ञ डा. पुनम लामा खटिएकी थिइन् ।
ग्रामीणवासीलाई लक्षित गरी सञ्चालन गरिएको अस्पतालले हालसम्म एक हजार पाँच सय भन्दाबढीलाई उपचार सेवा प्रदान गरिसकेको डा. तामाङले बताए ।
आफूलाई परेको समस्या खुलस्त रूपमा नभन्ने र लाज मानेर अस्पताल नजाने गरेको पाइएकाले महिला चिकित्सकबाटै परामर्श सहितको उपचार सेवा दिने गरिएको अस्पतालले बताएको छ ।
आफ्नो स्वास्थ्यप्रति सजक रही स्वास्थ्य संस्थामा जान सुझावसमेत दिँदै आइएको छ ।
