लुम्बिनी प्रदेशको पर्यटन नीति बनाउन प्रदेश सरकार जुटेको छ  । उद्योग, पर्यटन तथा यातायात मन्त्रालयले प्रदेशका विभिन्न जिल्ला पुगेर यसका लागि सुझाव संकलन गरिरहेको छ । 

सोही क्रममा मन्त्रालयको आयोजनामा बिहीबार बुटवलमा पर्यटनमैत्री नीति कसरी निर्माण गर्न सकिन्छ ? भन्ने विषयमा जनप्रतिनिधि तथा सरोकारवालाहरूसँग छलफल र अन्तरक्रिया गरिएको छ । 

कार्यक्रममा पर्यटन मन्त्री प्रचण्ड विक्रम न्यौपानेले लुम्बिनी प्रदेशलाई उत्कृष्ट पर्यटकीय गन्तव्य बनाउन पर्यटन नीति निर्माणमा जुटेको बताए । मन्त्रीका रूपमा पदभार ग्रहण गर्दा आफूले पर्यटन नीति निर्माण गर्ने पहिलो निर्णय गरेको न्यौपानेले उल्लेख गरे । 

भेगीय रूपमै सुझाव संकलन गरी त्यसको आधारमा पर्यटन नीति निर्माण गरिने मन्त्री न्यौपानेको भनाइ छ । लुम्बिनी प्रदेशमा पर्यटनको प्रचुर सम्भावना रहे पनि यसलाई प्रचारप्रसार र प्रवर्द्धन गर्न नसकिएको उनको भनाइ छ ।

कार्यक्रममा पर्यटन मन्त्रालयका प्रवक्ता गणेश घिमिरेले पर्यटन प्रवर्द्धनका लागि प्रदेश सरकारले अघि सारेका नीति तथा कार्यक्रमबारे जानकारी गराए । यसवर्ष ‘घुम्न जाऔं बर्दिया’ अभियान सञ्चालन गरिएकोमा आगामी वर्ष ‘जाउँ घुम्न जलजला’ अभियान सञ्चालन हुने उनले बताए । साथै, रुकुम पूर्वलाई पर्यटकीय हब घोषणा गर्ने तयारीसमेत भएको प्रवक्ता घिमिरेले बताए ।  

लुम्बिनी प्रदेश योजना आयोगका सदस्य डा.सुदन कुमार वलीले पर्यटन नीति निर्माणबाट यस क्षेत्रमा विकास र आर्थिक गतिविधिमा वृद्धि हुने विश्वास व्यक्त गरे । डा. वलीले पर्यटन क्षेत्रको सम्भावना र विकासबारे बहस गरेर आर्थिक क्षेत्रको पनि विकास गर्नुपर्ने धारणा राखे ।