इन्टरनेट सेवा प्रदायक सजिलो नेटले चर्चित लोकगायक बद्री पंगेनीलाई आफ्नो आधिकारिक ब्राण्ड एम्बेस्डरको रूपमा चयन गरेको छ। 

सोमबार पंगेनीसँग सम्पन्न सम्झौतासँगै, सजिलो नेटले देशभरका नेपाली परिवारसँग आफ्नो सम्बन्धलाई अझ प्रगाढ बनाउने दिशातर्फ महत्त्वपूर्ण कदम चालेको बताएको छ । 

नेपाली लोकसंगीत क्षेत्रमा ख्याति कमाएका पंगेनीले आफ्ना मार्मिक तथा सन्देशमूलक गीतमार्फत् लाखौं दर्शक-श्रोताको मन जित्न सफल भएका छन् । 

नेपाली सांगीतिक तथा लोकजीवनमा गहिरो छाप छोड्न सफल उनी सजिलो नेटको प्रतिनिधित्व गर्न उपयुक्त व्यक्ति रहेका कम्पनीले जनाएको छ । सजिलो नेट उच्च गतिको भरपर्दो इन्टरनेट सेवा सुलभ मूल्यमा प्रदान गर्ने लक्ष्यका साथ अगाडि बढिरहेको जनाएको छ । 

‘सजिलो नेटका लागि इन्टरनेट केवल प्रविधिमै सीमित छैन, यो हाम्रो संस्कृति, परम्परा र जनजीवनलाई जोड्ने एउटा महत्वपूर्ण माध्यम पनि हो’, सजिलो नेटका प्रमुख कार्यकारी अधिकृत सतीश कार्कीले भने, ‘बद्री पंगेनीज्यूको संगीतले जस्तै हामी पनि नेपालीहरूबीचको दूरी घटाउँदै सबैलाई सरल, सुलभ तथा सुपथ इन्टरनेट सेवामार्फत् जोड्ने प्रयास गरिरहेका छौं ।’

लोकप्रिय गायक पंगेनीले आफ्नो उत्साह व्यक्त गर्दै भने, ‘इन्टरनेट आजको जीवनशैलीको अभिन्न अंग बनिसकेको छ । सजिलो नेटले सहज र भरपर्दो इन्टरनेट सेवा उपलब्ध गराउँदै आएको छ, जसका कारण म यस ब्राण्डसँग जोडिन पाउँदा निकै खुशी छु ।’

सजिलो नेटले आधुनिक इन्टरनेट सेवा विस्तार गर्दै ग्राहकलाई उच्च गुणस्तरीय, सरल, सुलभ तथा सुपथ इन्टरनेट कनेक्टिभिटी प्रदान गर्ने लक्ष्य राखेको छ । पंगेनीसँगको सहकार्यले ब्राण्डलाई अझ बलियो बनाउने विश्वास लिइएको छ ।