नेपाली बजारमा सुनचाँदीको मूल्य अहिलेसम्मकै उच्च विन्दुमा पुगेको छ।

नेपाल सुनचाँदी व्यवसायी महासंघका अनुसार शुक्रबार छापावाल सुन तोलाको १ लाख ७४ हजार ५ सय रुपैयाँ पुगेको छ। यसअघिको उच्च विन्दु १ लाख ७१ हजार रुपैयाँ थियो ।

बुधबार भने सुन मूल्य १ लाख ७० हजार ५ सय रुपैयाँमा कारोबार भएको थियो । बिहीबार सार्वजनिक बिदाका कारण सुनचाँदीको कारोबार स्थगित भएकाले मूल्य निर्धारण भएको थिएन।

चाँदीको मूल्य पनि बढेर तोलाको २ हजार ५० रुपैयाँ पुगेको छ। बुधबार चाँदी तोलाको २ हजार रुपैयाँ थियो।

विशेषज्ञहरूका अनुसार अन्तर्राष्ट्रिय बजारमा सुनको मूल्य वृद्धि भएकाले नेपाली बजारमा पनि यसको प्रभाव परेको हो। 

पछिल्लो समय सुनको माग बढेसँगै यसको मूल्य निरन्तर बढ्ने संकेत देखिएको छ।