३१ जेठ २०८३, आइतबार
मकवानपुरको हेटौंडा उप–महानगरपालिका–१ चौकीटोलका राहुल दासले लागुऔषध दुर्व्यसनमा जेठी भाउजू र माइलो दाजुले रोकावट गरेपछि बाधा पन्छाउन ज्यान लिने उद्देश्यले खुर्पा र खुकुरी प्रहार गरेको बयान दिएका छन् ।
गत चैत १३ मा राहुलले जेठी भाउजू गुडियालाई खुर्पा र माइलो दाजु रुपेशलाई खुकरी प्रहार गरेका थिए । गुडियाको घटनास्थलमै मृत्यु भएको थियो । रुपेश हेटौँडा अस्पताल र मकवानपुर सहकारी अस्पतालमा उपचारपछि घर फर्किएका छन् ।
राहुल परिवारका सदस्यमध्ये कान्छा छोरा हुन् । उनका जेठा दाजु वैदेशिक रोजगारीको सिलसिलामा कतारमा थिए । साथी संगतमा उनी गाँजालगायत अन्य लागुऔषध सेवनको कुलतमा फसे ।
राहुलको बानी व्यहोरा जेठी भाउजू गुडियालाई मन परेको थिएन । रातिराति बाहिर हिँड्न थालेपछि उनले राहुललाई सम्झाउँदै ‘घरमा नबसेर रातिराति कहाँ हिँडेको ? गाँजा खान हिँडेको ? म दाइलाई भनिदिन्छु’ भन्दै घरबाहिर जान रोक्दै आएकी थिइन् । गुडियासँगै परिवारका अन्य सदस्यले पनि राहुललाई ‘गाँजासेवन गरिरहे सुधारगृहमा राख्छौं’ भनेर तर्साउँदै आएका थिए । तर, राहुलको बानी व्यहोरा सुध्रिएन । बरु झन् उनी लागुऔषधको कुलतमा फस्दै गए ।
घटना भएको दिन चैत १३ गते अपराह्न ३ बजेतिर गुडिया पूजाकोठामा सुतिरहेकी थिइन् । भतिजा र भतिजी पढ्न गएका थिए । बाबु लालबाबु र आमा मीनादेवी घरको छतमा रहेको फूलको गमलामा पानी हालिरहेका थिए । त्यही मौकामा राहुलले गुडियालाई मार्ने योजना बनाएको खुलेको छ ।
नजिकै बारीमा छिमेकी महिलाले खुर्पाले रुखको हाँगाबिँगा काट्दै गरेको देखेपछि राहुलले ‘कुकुरको खोर बनाउनुपर्यो, एकछिन खुर्पा दिनू न अन्टी’ भन्दै मागे । सुतिरहेकी आफ्नै भाउजू गुडियालाई त्यही खुर्पाले घाँटी, टाउको र छातिमा पटक–पटक प्रहार गरे । गुडियाको सास नजाउञ्जेल उनी कुरेर बसे । ‘अब त मरिन् होला’ भनेर राहुलले कसैले थाहा नपाऊन् भनेर मृत शरीर कोठाभित्रै थुनेर ताल्चा मारेको बयानमा खुलाएका छन् ।
त्यसपछि उनले आफू सुत्ने कोठामा पुगेर रगत लागेको कपडा फेरे । गुडियाको मोबाइल पानी भरिएको भाँडोमा हाले । त्यतिनै बेला माइलो दाजु रुपेश आउने बेला भएको र उनलाई पनि खुकुरीले छप्काउनुपर्छ भनेर राहुल खुकुरी लिएर बसेको खुलेको छ । रुपेश आएर ‘कता जान लागेको ?’ भन्दै राहुललाई प्रश्न गरेलगत्तै उनले खुकरी प्रहार गरे । टाउकोमा खुकुरी प्रहार भएपछि रुपेशले खुकुरी समाते ।
उनी छट्पटाउँदै रुन कराउन थालेपछि छिमेकीहरू भेला भए । त्यहीबेला प्रहरी आएर राहुललाई पक्राउ गर्यो । त्यतिबेलासम्म राहुलले जेठी भाउजू गुडियाको हत्या गरेर पूजा कोठा बन्द गरेको कुरा अरूलाई सुनाएका थिएनन् । परिवारका अन्य सदस्यले गुडियाको खोजी गर्दा पूजा कोठामा ताला बन्द थियो । राहुलकी आमाले पूजाकोठाको झ्यालबाट गुडियाको शव देखेपछि ढोका फोडेर हेर्दा गुडिया रगतमा लत्पतिएको अवस्थामा मृत भेटिएकी थिइन् ।
प्रहरीले अनुसन्धान सकाएर मिसिल सरकारी वकिल कार्यालयमा बुझाएपछि कार्यालयले यही वैशाख ५ गते जिल्ला अदालत मकवानपुरमा कर्तव्य ज्यान मुद्दा दर्ता गरेको छ ।
सरकारी वकिल कार्यालयसँगको बयानमा राहुलले भनेका छन्– ‘जेठी भाउजू गुडिया र माइलो दाजु रुपेशलाई जबसम्म मार्दिनँ, तबसम्म मलाई यिनीहरूले तनाव दिइराख्छन् भन्ने सोच बनाएर विगत एक महिनादेखि नै यिनीहरूको हत्या गर्ने योजना बनाएको थिएँ ।’
उनले कसैले नदेख्ने गरी गुडिया र रुपेशको हत्या गर्ने समय कुरेर बसेको र चैत १३ गते उक्त समय आएपछि आफूले हत्या गर्ने उद्देश्यले नै खुर्पा र खुकुरी प्रहार गरेको बयान दिएका छन् ।
घाइते रुपेशले गरेको घटना विवरण कागजमा पैसा कलेक्सनको काम नभएपछि आफू घटना भएको दिन घरमै आराम गरेर बसिरहेको उल्लेख गरेका छन् । रुपेशले आफ्नी जेठी भाउजू गुडियाको हत्याको सूचना २ दिनपछि मात्रै थाहा पाएको उल्लेख गरेका छन् ।
सरकारी वकिल कार्यालयले राहुललाई खुर्पा दिने स्थानीय नानु रुम्बाको पनि कागज गरेको छ । नानुका अनुसार राहुल कुकुरको खोर बनाउन भन्दै खुर्पा माग्न आएका थिए । तर, ‘खुर्पाको दाँत झरेकाले काठ काट्छ त ?’ भनेर सोध्दा ‘काट्छ आन्टी’ भन्दै राहुलले खुर्पा लिएर गएको नानुले उल्लेख गरेकी छिन् । एकछिनपछि राहुलका आमाबाबु चिच्च्याएपछि उसको घर पुग्दा रुपेश रगतपिच्छे भएको देखेर आफू झस्किएको नानुले कागजमा खुलाएकी छिन् ।
सरकारी वकिल कार्यालय मकवानपुरका जिल्ला न्यायाधिवक्ता विनोद पौडेलले राहुलविरुद्ध मुलुकी अपराधसंहिता, २०७४ को दफा १७७ बमोजिमको सजाय मागदाबी लिएर अदालतमा मुद्दा दर्ता गरेका छन्।
